قر پرەزيدەنتى نۇرسۇلتان نازارباەۆ. فوتو: گازەتا.رۋ

قر پرەزيدەنتى نۇرسۇلتان نازارباەۆ ازىق-تۇلىك داعدارىسىنىڭ ۋاقىتى جاقىنداپ قالعانىن مالىمدەدى. ونىڭ سوزىنشە، وسىعان بايلانىستى قازاقستاندا ازىق-تۇلىك وندىرەتىن ءىرى اۋىل شارۋاشىلىعى ورىندارىن دامىتۋ كەرەك. 

نۇرسۇلتان نازارباەۆ استانا كلۋبىنىڭ وتىرىسى كەزىندە جاھاندىق ميگراتسيا ماسەلەلەلەرىنە توقتالدى.

"ميگراتسيا ماسەلەلەرى تۇپكىلىكتى قايتا قاراۋدى تالاپ ەتەدى. ادامزات تاريحىندا قازىرگى كۇنگىدەي دەموگرافيالىق ديسبالانس بايقالعان ەمەس. مىسالى دامىعان ەلدەردە حالىق سانى 1 ملرد ادامدى قۇرايدى، ال دامۋشى ەلدەردە  – 6,5 ملرد", – دەدى نازارباەۆ.

پرەزيدەنتتىڭ سوزىنشە، سوڭعى 25 جىلدا حالىقارالىق ميگرانتتاردىڭ سانى ەكى ەسەگە كوبەيىپ، قازىرگى كەزدە 250 ملن ادامنان اسقان. وسىعان بايلانىستى دامىعان ەلدەردەگى ميگرانتتاردىڭ ۇلەسى 5 پايىزدان 10 پايىزعا دەيىن ارتقان. بۇۇ اقپاراتىنشا، ولاردىڭ 66 ميلليونى بوسقىندار مەن زاڭسىز ميگرانتتار.

"ادامدار نەگىزىنەن كەدەيشىلىك پەن سوعىستاردان قاۋىپتەنگەندىكتەن قونىس اۋدارۋعا ءماجبۇر. بۇل الەۋمەتتىك  شيەلەنىسكە، قىلمىستىڭ ارتۋىنا جانە جۇمىسسىزدىقتىڭ كۇشەيۋىنە اكەلەدى. تاياۋ شىعىس پەن افريكادان كەلگەن بوسقىندار ەۋروپادا كوبەيىپ، الەۋمەتتىك-ساياسي داعدارىس تۋىنداتىپ وتىر... ونىڭ ۇستىنە، ليۆان، يوردانيا، تۇركيا سىنى ەلدەردە بوسقىنداردى اسىراۋعا جالپى ىشكى ءونىمىنىڭ 1,5-3 پايىزى جۇمسالادى»، - دەدى پرەزيدەنت.

بۇدان بولەك پرەزيدەنت كەيبىر ەلدەردەگى سۋ تاپشىلىعى مەملەكەتارالىق قايشىلىقتارعا اكەلىپ سوعىپ جاتقانىن جانە الداعى ۋاقىتتا جەر الەمدە حالىق سانىنىڭ ارتۋىنان ازىق-تۇلىك داعدارىسى بولاتىنىن ايتتى.

“The Qazaq Times”