اقش 45-ءشى پرەزيدەنت ءسوز سويلەپ تۇر، 44-ءشى پرەزيدەنتى تىڭداپ وتىر. فوتو:PopSugar

ۋاشينگتون – جۇما، ء(بىزدىڭ ۋاقىتپەن سەنبىنىڭ تاڭىندا) دونالد ترامپ (Donald John Trump) رەسمي تۇردە اقش-تىڭ 45 كەزەكتى پرەزيدەنتى بولىپ تاعايىندالدى. ترامپ ءوزىنىڭ وكىلەتتى مەرزىمىندە قالىپتى جۇيەنى بۇزباۋ شارتى استىندا امەريكا قۇراما شتاتتارىنىڭ داڭقىن قالپىنا كەلتىرۋگە ۋادە بەردى. بۇل تۋرالى "The New York Times" حابارلايدى.

ۋاشينگتونداعى پارلامەنت سارايىنىڭ الدىنا نەشە ون مىڭداعان ادامداردىڭ جينالعانىن كورۋگە بولادى. ازداعان سەبەزگى جاڭبىر جاۋىپ تۇردى. ترامپ بولسا امەريكانىڭ بۇگىنىن سيپاتتاعاندا – قايشىلىقتار مەن جاپاعا تولى كۇرەستەر، ۋاشينگتونداعى ءبىر توپ ەليتانىڭ ءبارىن قولىنا ۇستاي وتىرىپ،  حالىقتى ۇمىت قالدىرۋ، بۇكىل الەمنىڭ ىرىقسىز كەرى كەتىپ بارا جاتۋى دەپ كورسەتتى. ول ءوزىنىڭ بيلىككە كەلۋىمەن مۇنىڭ ءبارى كەرىسىنشە بولادى دەپ سەنىم ءبىلدىردى.

ترامپتىڭ امەريكاعا ۋادە بەرۋى. فوتو: Belfast Telegraph

ونىڭ 16 مينۋتتىق ءسوزىنىڭ باستى ۇرانى مىناداي بولدى:

  • «اقش-تىڭ بۇل كەسكىلەسكەن تەكە-تىرەسى ءدال وسى ساتتەن باستاپ شەشىمىن تابادى».
  • «بوس سوزدەردىڭ ءداۋىرى وسىمەن ءوتىپ كەتتى، ەندى ناعىز ارەكەت ەتۋدىڭ ۋاقىتى تۋدى».
  • «كەز كەلگەن ادامنىڭ بۇل جۇزەگە اسپايدى دەپ ايتۋىنا جول بەرمەڭىز».

ول ماراپاتتاۋ ءراسىمى تەك قانا بيلىكتىڭ الماسۋىن عانا بىلدىرمەيتىنىن، بۇل ءبىر پارتيادان كەلەسى ساياسي پارتياعا بەيبىت وتكەرىپ بەرۋ بولىپ سانالاتىنىن ايتتى. ول ءسوز اراسىندا:  «ءبىز ۋاشينگتوننان بارىنشا دەمەۋ كورسەتەمىز، ال سىزدەر – حالىق – قۋاتتى كۇشكە اينالاسىزدار»، - دەپ سەندىردى.

اقش-تا قالىپتاسقان، رەفورمالاۋدى كۇتىپ تۇرعان ءبىر قاۋىم ىستەر تۋراسىندا تولعانا كەلىپ، دونالد ترامپ: «ۇزاقتان بەرى ۋاشينگتونداعى از عانا توپ، بيلىكتى قامتىپ ۇستاۋعا بارىنشا قۇلشىندى. ۋاشينگتوننىڭ بيلىگى بارعان سايىن ۇلعايىپ، بيلەۋشىلەر قۇدىرەتتەندى، حالىق ولاردىڭ الدىنداعى اسىنا اينالدى. كاسىپكەرلەر تىعىرىققا تىرەلىپ، كاسىپ ورىندار جابىلدى. بۇل قالىپتاسقان كۇشتەر، ەلىمىزدىڭ ازاماتتارىنا قاراعاندا ءوز مۇددەسىن كوبىرەك قورعادى. ولاردىڭ تابىسى استە ءسىزدىڭ تابىسىڭىز ەمەس، ولاردىڭ جەتكەن جەتىستىگى ەش ۋاقىتتا ءسىزدىڭ جەتىستىگىڭىز ەمەس ەدى»، – دەي كەلىپ، قالىپتاسقان ءۇردىستى وزگەرتىپ، امەريكاعا باسىمدىق بەرۋگە ۋادە ەتتى. «ەندى ەلىمىزدەگى قاشاندا ۇمىت قالىپ كەلگەن ءاربىر ازاماتى ەسكەرۋسىز قالمايدى»، – دەپ ءسوزىن تۇيىندەدى.

اقش جوعارى سوتىنىڭ باس سۋدياسى، بار-جوعى 35 سوزدەن تۇراتىن قىسقا عانا تاعايىنداۋ ءسوزىن سويلەدى. وسىدان كەيىن، دونالد ترامپ پرەزيدەنت تاعايىنداۋ جارلىعىنا قول قويىپ، اق ۇيدەگى ءوز قىزمەتىن رەسمي تۇردە باستاپ كەتتى.

 

“The Qazaq Times”