فوتو: كومسومولسكايا پراۆدا

رەسەي پرەمەر-ءمينيسترى دميتري مەدۆەدەۆ قازاقستان مەن قىرعىزستان اراسىنداعى داۋعا پىكىر ءبىلدىردى.

بۇگىن وزبەكستان استاناسى تاشكەنت قالاسىندا وتكەن تمد ەلدەرى ۇكىمەت باسشىلارىنىڭ كەزەكتى باس قوسۋىندا رەسەي پرەمەر-ءمينيسترى دميتري مەدۆەدەۆ قازاق-قىرعىز قارىم-قاتىناسىنداعى داۋعا پىكىر ءبىلدىردى. ول وندا: «بۇگىنگى كەزدەسۋدىڭ وزىندە قازاقستان مەن قىرعىزستان اراسىندا وتە اۋىر جانە وتكىر پىكىر الماسۋ بولدى. پىكىر الماسۋ بارىسىندا ەكى ەل اراسىنداعى قاراما-قايشىلىقتار ءجيى بايقالدى. تمد ەلدەرى ۇكىمەت باسشىلارىنىڭ كەڭەسى، ەاەو مۇشە ەلدەردىڭ پرەمەر-مينيسترلەرى كەڭەسى وسىنداي ماسەلەلەردى شەشۋگە ارنالعان مىنبەر» - دەدى.

ەستەرىڭىزگە سالايىق، ءدال وسى باس قوسۋدا قىرعىزستان پرەمەر-ءمينيسترى ساپار يساكوۆ قازاق-قىرعىز شەكاراسىنداعى جاعدايعا بايلانىستى قازاقستان بيلىگىن قاتاڭ سىنعا العان بولاتىن. يساكوۆتىڭ سوزىنشە، قازاقستان تاراپى  وسى ۋاقىتقا دەيىن شەكارا داۋىنا بايلانىستى ءتۇرلى سىلتاۋلار ايتىپ كەلگەن. ال ءوز كەزەگىندە قازاقستان پرەمەر-ءمينيسترى باقىتجان ساعىنتاەۆ قىرعىز ۇكىمەت باسشىسىنىڭ ايىپتاۋلارى نەگىزسىز دەپ، قىرعىزستان اتالمىش ماسەلە بويىنشا قازاقستان تاراپى قويعان تالاپتاردى ورىنداسا، كەلىسسوز جۇرگىزۋگە دايىن ەكەندىگىن ايتقان.

“The Qazaq Times”