كاتالونيانىڭ باسشىسى بريۋسسەلدەن ساياسي باسپانا سۇراۋى مۇمكىن

يسپانيا بيلىگى تاراپىنان ايىپ تاعىلىپ، باس بوستاندىعىنا قاۋىپ تونگەن كاتالونيانىڭ بۇرىنعى باسشىسى كارلەس پۋدجەمونت بەلگيا استاناسى بريۋسسەلدە جۇرگەنى تۋرالى حابار تارادى. وسى اپتادا كاتالونيا بيلىگىن ءوز قولىنا العان يسپانيانىڭ باسقارۋشى وكىلدەرى رەفەرەندۋم ۇيىمداستىرۋعا قاتىسى بار باسشىلاردى تۇگەل قىزمەتىنەن بوساتىپ، جاڭادان سايلاۋ وتكىزەتىنىن جاريالادى. 

وزىنە قارسى تاعىلعان ايىپتاردان باس ساۋعالاپ، بريۋسسەلگە كەلگەن كارلەس پۋدجەمونت ارى قاراي بارلىق جولداردى قاراستىرىپ كورەتىنىن جەتكىزدى. ونىڭ قورعاۋشىسى ءدال قازىر كارلەس پۋدجەمونتقا قارسى ناقتى دالەلدەنگەن ايىپ بولماعاندىقتان، ونىڭ ەل شەكاراسىنان تىس جەردە قالۋعا قۇقىعى بار ەكەنىن ايتتى.

يسپانيانىڭ باس پروكۋرورى حوسە مانۋەل مازا حالىقتى كاتالونيانىڭ بۇرىنعى باسشىلارىن حالىقتىڭ اراسىندا جاپپاي بەيبەرەكەتسىزدىك ورناتىپ، قازىنانىڭ قارجىسىن ورىنسىز جۇمساعانى ءۇشىن ايىپتاۋعا شاقىردى. ەگەر پۋددجەمونتقا تاعىلعان ايىپتار سوتتىڭ قولداۋىنا يە بولسا، ول 30 جىلعا تۇرمەگە جابىلۋى مۇمكىن.

بەلگيانىڭ ميگراتسيا جونىندەگى ءمينيسترى تەو فرانكەن كاتالونيادا قۋدالاۋعا ۇشىراعان مينيسترلەر بريۋسسەلدەن ساياسي باسپانا الۋعا ءوتىنىش بەرە الاتىندىعىن جاريالادى. ول پۋدجەمونت باستاعان توپتىڭ يسپانيادا ءادىل سوتقا قول جەتكىزەتىنىنە سەنبەيدى.

قازىر كاتالونيادا قىزمەتىنەن بوساتىلعان باسشىلاردىڭ سانى - 150-گە جۋىق. جاڭا پرەزيدەنت سايلاۋى 21 جەلتوقسانعا بەلگىلەندى. كارلەس پۋدجەمونت باستاعان مينيسترلەر كابينەتى ولاردىڭ لاۋازىمىن تەك كاتالونيا حالقى عانا تارتىپ الا الاتىندىعىن جەتكىزدى.

“The Qazaq Times”