فوتو: AFP 2017 / Bulent Kilic

بۇگىن استانا قالاسىندا جەتىنشى رەتكى ءسۇريا كەلىسسوزى باستالادى. كەلىسسوز ەكى كۇنگە سوزىلادى. جەكسەنبى كۇنى استاناعا ءار ەلدەن دەلەگاتسيالار كەلە باستاعان. 

قر سىرتقى ىستەر مينيسترلىگىنىڭ مالىمەتىنشە، رەسەي دەلەگاتسياسىنا رف پرەزيدەنتىنىڭ ءسۇريا جونىندەگى ارنايى وكىلى الەكساندر لاۆرەنتەۆ، تۇركيا دەلەگاتسياسىنا سىرتقى ىستەر ءمينيسترىنىڭ ورىنباسارى سەدات ونال، يران دەلەگاتسياسىنا سىرتقى ىستەر ءمينيسترىنىڭ ورىنباسارى حۋسەين دجابەري انساري باسشىلىق ەتەدى.

الداعى كەزدەسۋگە ءسۇريا ۇكىمەتىنىڭ جانە سۇريالىق وپپوزيتسيانىڭ، سونداي-اق بايقاۋشى رەتىندە بۇۇ، اقش جانە يوردانيانىڭ وكىلدەرى قاتىسادى.

"الداعى كەزدەسۋ ءسۇريادا ۇرىس ءىس-قيمىلدارىن دوعارۋ رەجيمىن نىعايتۋ بويىنشا قول جەتكىزىلگەن ناتيجەلەردى ساقتاۋعا، سونداي-اق داعدارىستى ساياسي رەتتەۋگە ءوتۋ كەزەڭىندە اتالعان ەلدەگى جاعدايدى ءارى قاراي تۇراقتاندىرۋ شەڭبەرىندە كۇش-جىگەرلەردى ارتتىرۋعا باعىتتالعان", - دەلىنگەن مينيسترلىكتىڭ ءباسپاسوز حابارلاماسىندا.

“The Qazaq Times”