فوتو: Naked-science

سان-فرانتسيسكوداعى ستارتاپ جاساۋشىلار مۇمكىندىگى جوعارى گادجەتتەر مەن جاساندى ينتەللەكتپەن قامتاماسىز ەتىلگەن «بولاشاقتىڭ» ەمحاناسىن اشتى. بۇل تۋرالى Naked-science حابارلايدى.

Forward ستارتاپتارى اشقان بۇل مەديتسينالىق ورتالىق ءداستۇرلى ەمحانالاردان گورى، Apple كومپانياسىنىڭ دۇكەندەرىنە ۇقسايدى. ستارتاپ قىزمەتكەرلەرى مەديتسيناعا وسىنداي تاسىلدەر ەنگىزۋ كەرەك دەپ ەسەپتەيدى.

ەمدەلۋشىلەر ءبىرىنشى كۇننەن باستاپ ءوزىنىڭ ەلەكتروندى قولىن قويادى، سودان كەيىن ادام دەنەسىن سكانەرلەۋگە ارنالعان ارنايى اناليزدەن وتەدى. ول قۇرىلعىلار ءتۇرلى بيومەتريكالىق اقپاراتتاردى قابىلداعاننان كەيىن، پاتسيەنت اناليز جاۋاپتارىن سمارتفونداعى ارنايى قوسىمشانىڭ كومەگىمەن كورۋ مۇمكىندىگىنە يە بولادى. بۇل ءبىر.

ەكىنشىدەن. ەم الۋشىنىڭ دياگنوستيكا بولمەسىندە: پاتسيەنت تۋرالى ينتەگراتسيالانعان دەرەكتەر مەن ناۋقاستىڭ دەنساۋلىعى جايلى بارلىق ماعلۇماتتار كورسەتىلگەن ۇلكەن سەنسورلىق ديسپلەي ورنالاسقان. دارىگەر ناۋقاسپەن سويلەسىپ وتىرعاندا، جاساندى ينتەللەكت ونىڭ اڭگىمەسىن باقىلاپ وتىرادى. ناتيجەسىندە ەكرانعا ونىڭ ناۋقاسى جايلى اقپاراتتاردى شىعارىپ، ەمدەۋ جولدارىن ۇسىنادى.

سونىمەن قاتار، Forward كومپانياسى بىرنەشە جاڭا مەديتسينالىق قۇرال-جابدىقتار شىعاردى. ولاردىڭ ىشىندە – سىمسىز  ساندىق ستەتوسكوپ بار. ونىڭ ەرەكشەلىگى: ادامنىڭ جۇرەك قاعىسىن سىرت كيىمى بولسا دا تەكسەرە الادى. جانە ءبىر قۇرال – ينفراقىزىل قۇرال ارقىلى تامىرعا جارىق تۇسىرەدى دە، ناتيجەسىندە قان الۋ پروتسەسى جەڭىلدەيدى. بۇل ءۇش.

قازىرگى ۋاقىتتا بۇل عىلىمي-فانتاستيكالىق مەديتسينا ورتالىعىندا ەم الۋدىڭ قۇنى – اي سايىن 149 اقش دوللارىن قۇرايدى. الايدا، ستارتاپ نەگىزىن قالاۋشىلاردىڭ ايتۋىنشا، تاعى دە تەحنولوگيانى دامىتىپ، كوبەيتەر بولسا،  ەمدەلۋدىڭ باعاسىن ارزانداماق.

"The Qazaq Times"