رەسەي ەڭ قۋاتتى يادرولىق قارۋىن سىناقتان وتكىزبەك

رەسەي «ساتان-2» اتتى يادرولىق قارۋىن سىناقتان وتكىزەدى. بۇل يادرولىق قارۋدىڭ قۋاتى اقش-تىڭ ەكىنشى دۇنيەجۇزىلىك سوعىس كەزىندە جاپونيا ارالدارىنا تاستاعان ەكى اتوم بومباسىنان 15 ەسەگە قۋاتتى. بۇل تۋرالى Reuters اقپاراتتىق اگەنتتىگى مالىمدەدى.

اتالعان يادرولىق قارۋدى الىپ ۇشاتىن زىمىراننىڭ سالماعى 100 توننادان اسادى. بۇل وزىمەن بىرگە 15 يادرولىق وق تۇمسىقتى الىپ جۇرۋگە قابلەتتى. ماسكەۋ جاق تاراتقان مالىمەتكە قاراعاندا، يادرولىق سىناق بيىل جىل سوڭىنا دەيىن اياقتالادى. ءارى بۇل قارۋدىڭ اقش قورعانىس جۇيەلەرىن دە جويا الاتىنىن العا تارتۋدا.

سوڭعى جىلدارى رەسەي قارۋلى كۇشتەرگە بولىنەتىن بيۋدجەتتى ارتتىردى جانە قارۋلاردى جاپپاي جاڭارتۋدى قولعا الىپ كەلەدى. رەسەيدىڭ قورعانىس بيۋدجەتى 2006 جىلمەن سالىستىرعاندا ەكى ەسەگە ارتقان. رەسەيدىڭ يادرولىق سىناققا دايىندالۋى اقش پرەزيدەنتى دونالد ترامپتىڭ ەلدىڭ يادرولىق ارسەنالىن جاڭارتۋىنا بەرگەن جاۋابى بولىپ وتىر.

“The Qazaq Times”