قازاقستاننىڭ كۇمىسىن ەڭ كوپ ساتىپ العان ەل - ۇلىبريتانيا

قازاقستان 2017 جىلدىڭ قاڭتار-شىلدە ايىندا شەتەلگە 694 توننا كۇمىس تاسىمالداعان. ساتىلعان مەتالدىڭ جالپى قۇنى 363,7 ملن دوللارعا جەتكەن. 

ستاتيستيكا كوميتەتىنىڭ مالىمەتىنشە، 2016 جىلدىڭ وسى كەزەڭىمەن سالىسىرعاندا (794,7) بيىل ەكسپورت كولەمى 12,6 پايىزعا ال قاراجات ەسەبى بويىنشا 8,6 پايىزعا قىسقارعان.

كۇمىستىڭ ەڭ كوپ بولىگى ۇلىبريتانياعا جەتكىزىلگەن. اتالعان ەل قازاقستاننان 301,9 ملن دوللارعا 582,5 توننا كۇمىس ساتىپ العان. دەگەنمەن 2016 جىلدىڭ سايكەس كەزەڭىنە قاراعاندا بۇل ەلگە ەكسپورتتالعان مەتالل كولەمى 26,7 پايىزعا قىسقارعان.

ال ەكىنشى ورىندا گەرمانيا. بۇل ەلگە 53,8 ملن دوللارعا 97,4 توننا كۇمىس جونەلتىلگەن. ال اقش 7,8 ملن دوللارعا 14,6 توننا كۇمىس ساتىپ العان.

سونداي-اق، باسقا ەلدەرگە ساتىلعان التىن كولەمى مۇلدە ازايعان. مىسالى وتكەن جىلدىڭ جەتى ايىندا قازاقستان 14,1 ملن دوللارعا 0,6 توننا التىن ەكسپورتتاسا، بيىل 2,9 مىڭ دوللارعا عانا التىن ەكسپورتتالعان.

“The Qazaq Times”