يتاليانىڭ اۆتونوميالىق وڭىرلەرى بيلىگىن كەڭەيتۋ ءۇشىن داۋىس بەردى

يسپانيانىڭ كاتالونيا ايماعىندا باستالعان سەپاراتيستىك قوزعالىس يتاليادا جالعاسىن تاپتى. يتاليانىڭ سولتۇستىكتەگى ەكونوميكالىق الەۋەتى جوعارى ەكى ءوڭىرى كەڭەيتىلگەن اۆتونومياعا قول جەتكىزۋدى قالايتىندارىن ءبىلدىرىپ، داۋىس بەردى. بۇل تۋرالى APF اقپاراتىق اگەنتتىگى جازدى. 

ءوڭىر باسشىلارىنىڭ ايتۋىنشا، جەكسەنبى كۇنى وتكەن رەفەرەندۋمعا قاتىسقان حالىقتىڭ 90 پايىزعا جۋىعى اۆتونوميا بيلىگىن كەڭەيتۋگە داۋىس بەرگەن. بۇل شارانىڭ يتاليانىڭ ورتالىق بيلىگى ءۇشىن زاڭدى كۇشى بولماعانىمەن، حالىق اراسىندا بۇرىننان قالىپتاسقان "سولتۇستىكتىڭ باي اۋداندارى كەدەي وڭتۇستىكتى اسىراۋدى دوعارۋى كەرەك" دەگەن سەپاراتيستىك كوڭىل-كۇيدىڭ كاتالونيا وقيعاسىنان كەيىن جاڭا سيپات الا باستاۋى الاڭداتارلىق جاعداي.

بۇل تۋرالى ەۋروپا پارلامەنتىنىڭ باسشىسى انتونيو تاياني: "ەۋروپاداعى نەگىزگى ۇلتتاردان وزگە حالىقتاردىڭ مەملەكەتتەن ءبولىنۋ تۋرالى يدەيالارىنىڭ تارالۋىنا قارسى تۇرۋ كەرەك. سوندىقتان ەۋروپادا ەشكىم كاتالونيانىڭ تاۋەلسىزدىگىن مويىنداماۋى ءتيىس", - دەپ كەسىپ ايتتى.

لومبارديا ءوڭىرى جىل سايىن ريمگە 54 ملرد ەۋرو، ال ۆەنەتو 15,5 ملرد ەۋرو سالىق تولەيدى. دەگەنمەن ولاردىڭ ايماقتىڭ قاجەتتىلىكتەرىنە الاتىن بيۋدجەتى اتالعان قارجىدان الدەقايدا از. ەندى قوس ءوڭىر باسشىلارى ورتالىق ۇكىمەتتەن جىل سايىنعى قازىناعا وتكىزىلەتىن اقشا كولەمىن ەكى ەسەگە قىسقارتىپ، ينفراقۇىرىلىم، دەنساۋلىق ساقتاۋ مەن ءبىلىم بەرۋ ءىسىن جەتىلدىرۋگە قاتىستى ناقتى ۇسىنىستارىن ريمگە جولداۋعا بەكىنىپ وتىر. سونداي-اق لومبارديا مەن ۆەنەتوداعى ميگراتسيا مەن قاۋىپسىزدىكتى قاداعالاۋ تەتىكتەرىن ءوز قولدارىنا الۋدى قالايدى.

“The Qazaq Times”