الەكسەي ناۆالنىي بوستاندىققا شىقتى

رەسەيلىك وپپوزيتسيونەر، الداعى پرەزيدەنت سايلاۋىنا ۇمىتكەر الەكسەي ناۆالنىي بوستاندىققا شىقتى. وسىعان دەيىن ول بەيبىت شەرۋلەر وتكىزۋ تۋرالى زاڭدى بۇزدى دەگەن ايىپپەن اباقتىعا جابىلعان بولاتىن. سايلاۋالدى كامپانياسىنا قايتا ورالعان قوعام بەلسەندىسى تۋرالى APF اقپاراتتىق اگەنتتىگى جازدى. 

ول ءوزىنىڭ Instagram پاراقشاسىنا "سالەم! مەن بوستاندىقتامىن" دەپ جازدى. كەيىننەن ونىڭ جەكە فوتوگرافى ناۆالنىيدىڭ ارىپتەستەرىمەن كەزدەسۋ ساتىنەن سۋرەتتەر جاريالادى. سونداي-اق رەسەيلىك وپپوزيتسيونەر استراحاندا الاڭعا جينالعان 300 اداممەن كەزدەسىپ، ءوز سوزىندە: "بىزگە ءوزىمىزدى مازاق ەتەتىن وسىنداي بيلىك قاجەت پە؟ وسى سەبەپتى دە مەن ءوز كانديداتۋرامدى ۇسىنىپ وتىرمىن", - دەدى.

الەكسەي ناۆالنىي بيىلعى جىلى زاڭسىز قوعامدىق شەرۋلەر ۇيىمداستىرعانى ءۇشىن 2 رەت (15 كۇن جانە 25 كۇن مەرزىمگە) تۇرمەگە جابىلدى. ونىڭ سوڭعى رەت اباقتىدا بولعان كەزىندە وپپوزيتسيونەردىڭ قولداۋشىلارى كرەملگە جاقىن جەردەگى كوپىرگە "پۋتيننەن قۇتىلىپ، ناۆالنىيدى سايلايتىن ۋاقىت كەلدى" دەگەن باننەر ءىلىپ كەتكەن.

الەكسەي ناۆالنىي پرەزيدەنتتىك سايلاۋعا تۇسۋگە كانديداتۋراسىن ۇسىنعان جاڭا ۇمىتكەر كسەنيا سوبچاك تۋرالى ءالى ەشقانداي پىكىر بىلدىرگەن جوق. دەگەنمەن ونىڭ سايلاۋعا قاتىسۋ ىقتيمالدىلىعى تۋرالى قاۋەسەت تاراي باستاعان كەزدە ناۆالنىي ونى "كرەملدىڭ لاس ويىنىنا" بالاپ، ءپۋتيننىڭ قالاۋىمەن ادەيى قاتارعا قوسىلىپ وتىرعان "جالعان ۇمىتكەر" دەپ اتاعان ەدى. اكەسى اناتولي سوبچاك سانكت-پەتەربۋرگ قالاسىنىڭ مەرى جانە ۆلاديمير پۋتينگە جاقىن ادامداردىڭ ءبىرى بولعان كسەنيا ءوزىن "بارلىق تاراپقا قارسى" ازامات دەپ ەسەپتەيدى. ول الەكسەي ناۆالنىيعا وسىعان دەيىن تاعىلعان ايىپتاردىڭ سالدارىنان، ونىڭ  2024 جىلعا دەيىن سايلاۋعا قاتىسا الماي قالۋ قاۋپىنىڭ جوعارى ەكەندىگىنە قاراماستان، وپپوزيتسيونەردى ۇمىتكەرلەر تىزىمىنەن تۇسىرمەۋگە بارىن سالاتىنىن جەتكىزدى.

ۆلاديمير پۋتين 2018 جىلدىڭ ناۋرىز ايىندا بولاتىن پرەزيدەنتتىك سايلاۋعا قاتىساتىنىن ءالى راستاعان جوق. دەگەنمەن ساراپشىلار ونىڭ قاتىسىپ، 2024 جىلعا دەيىن تاعى دا 6 جىلدىق مەرزىمگە لاۋازىمىن ساقتاپ قالاتىنى تۋرالى بولجامداردى ءجيى ايتادى.

“The Qazaq Times”