باراك وباما اقش-تىڭ قازىرگى بيلىگىن سىنادى

اقش-تىڭ بۇرىنعى پرەزيدەنتى باراك وباما امەريكا بيلىگىندەگى قازىرگى جاعدايدى سىنعا الىپ، جۇرگىزىپ وتىرعان ساياسات «قوعامعا زيان كەلتىرەدى» دەپ مالىمدەدى.

ء"بىزدىڭ كورىپ وتىرعانىمىز ەشكىمگە ۇنامايدى... ساياسات ءبىزدىڭ بەدەلىمىزدى ارتتىرۋدىڭ ورنىنا، قوعامعا زيان كەلتىرىپ وتىر", - دەدى وباما. ول بۇل تۋرالى ۆيردجينيا شتاتىنداعى گۋبەرناتورلىق سايلاۋدا دەموكراتيالىق كانديداتتى قولداۋعا ارنالعان ميتينگىدە سويلەگەن سوزىندە ايتتى.

"مەن سوڭعى كەزدە بيلىككە قاراتا ەشتەمە ايتقان ەمەسپىن. الايدا مەن ادامداردى الالاۋ ارقىلى ناۋقان وتكىزىپ، كەيىن ولاردىڭ باسىن بىرىكتىرىپ، باسقارۋ قيىن بولاتىنىن جاقسى بىلەمىن", - دەدى اقش-تىڭ 44 پرەزيدەنتى.

ول سوزىندە اقش-تىڭ قازىرگى پرەزيدەنتىنىڭ اتىن اتاماعانمەن، ۆيردجينياداعى گۋبەرناتور جارىسىنان باستاپ مەملەكەت باسشىسىن، ونىڭ يمميگراتسيالىق جانە كحدر-عا جۇرگىزىپ وتىرعان ساياساتىن سىنعا الدى.

ايتا كەتەيىك، وتكەن اپتادا ترامپتىڭ  قازىرگى ساياساتىن رەسپۋبليكالىق سەناتور دجون ماككەين مەن اقش-تىڭ بۇرىنعى پرەزيدەنتى كىشى دجوردج بۋش سىناعان. قۇراما شتاتتىڭ بۇرىنعى پرەزيدەنتى نيۋ-يوركتەگى بۋش ينستيتۋتىندا سويلەگەن سوزىندە ترامپتىڭ اتىن اتاعان جوق، الايدا ونىڭ ميگرانتتارعا، بوسقىندارعا جانە ەركىن ساۋداعا قارسى جاسالىپ وتىرعان ءىس-قيمىلدارىن سوكتى.

ال مەككەين ءوز كەزەگىندە اقش "جالعان ۇلتشىلدىققا" ارالاسىپ وتىرعانىنا ەسكەرتۋ جاسادى.

“The Qazaq Times”