فوتو: اك جايىك

ۇلتتىق بانك توراعاسى دانيار اقىشەۆ پارلامەنت ءماجىلىسى وتىرىسىندا «2018-2020 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرعاننان كەيىن جۋرناليستەردىڭ سۇراقتارىنا جاۋاپ بەردى. ول بانك سەكتورىنىڭ قارجىلىق ورنىقتىلىعىن ارتتىرۋ باعدارلاماسىن ىسكە اسىرۋ بارىسى تۋرالى حابارلادى.

د. اقىشەۆتىڭ سوزىنشە، قىركۇيەك جانە قازاندا ۇلتتىق بانك باسقارماسى «اتف بانك» اق-نىڭ، «ەۋرازيالىق بانك» اق-نىڭ، «تسەسنابانك» اق-نىڭ جانە «بانك تسەنتركرەديت» اق-نىڭ باعدارلاماعا قاتىسۋىن ماقۇلداعان. بۇل باعدارلاماعا 410 ميلليارد تەڭگە جۇمسالادى.

«اتالعان بانكتەر جانە ولاردىڭ ءىرى اكتسيونەرلەرى قارجىلىق ورنىقتىلىقتى ارتتىرۋ، اكتيۆتەردىڭ ساپاسىن جاقسارتۋ جانە جۇمىس ىستەمەيتىن كرەديتتەردىڭ دەڭگەيىن تومەندەتۋ جونىندەگى ءىس-شارالار جوسپارلارىن، سونداي-اق بانكتى ۇستەمە كاپيتالداندىرۋ بويىنشا جازباشا مىندەتتەمەلەر ۇسىندى»، - دەدى اقىشەۆ.

سونداي-اق، ول بانكتەردىڭ قارجىلىق ورنىقتىلىعىن ارتتىرۋ جونىندەگى ءىس-شارالار جوسپارلارى بەلگىلەنگەن تارتىپپەن ۇلتتىق بانكپەن كەلىسىلگەننەن كەيىن ۇلتتىق بانكتىڭ ەنشىلەس ۇيىمى – «قازاقستاننىڭ ورنىقتىلىق قورى» اق اتالعان بانكتەردىڭ رەتتەلگەن وبليگاتسيالارىن ساتىپ الاتىنىن ايتتى.

رەتتەلگەن وبليگاتسيالار دەگەنىمىز - كومپانيا بانكروتقا ۇشىرعان جاعدايدا نەمەسە تاراتىلعان كەزدە باسقا قارىزدارى مەن كرەديتتەرىنىڭ دەڭگەيىنەن تومەن بولاتىن كومپانيا قارىزى. ياعني رەتتەلگەن وبليگاتسيالارعا يە تۇلعالار كومپانيا بانكروت بولعان جاعدايدا ونداعى اكتيۆتەردەن (اكتسيونەرلەرىن قوسپاعاندا) ءوز ۇلەسىن الادى.

بۇدان بولەك اقىشەۆ  باسقا بانكتەردىڭ باعدارلاماعا قاتىسۋعا
وتىنىمدەرى بانكتەردىڭ قارجىلىق مودەلدەرىن كەلىسكەننەن كەيىن جانە بانكتەردىڭ باسشىلىعى مەن اكتسيونەرلەرى ۇلتتىق بانكتىڭ تالاپتارىن ورىنداعاننان سوڭ باس بانكتىڭ قاراۋىنا شىعارىلاتىنىن حابارلادى.

“The Qazaq Times”