رەسەي جاسىرىن تۇردە «تاليبان» قوزعالىسىن قارجىلاندىرىپ وتىر

رەسەي اۋعانستانداعى «تاليبان» قوزعالىسىن قارجىلاندىرىپ وتىر – دەپ جازدى ۇلىبريتانيالىق «The Times» گازەتى.

باسىلىم مالىمەتىنشە، رەسەي وزبەكستان ارقىلى اۋعانستانداعى «تاليبان» قوزعالىسىنا تەگىن مۇناي جەتكىزىپ بەرىپ وتىر. ال «تاليبان» قوزعالىسى ءوز كەزەگىندە بۇل مۇنايدى ساتۋ ارقىلى ايىنا 2,5 ميلليون دوللار كولەمىندە پايدا تابۋدا. ماقالا اۆتورىنىڭ سوزىنشە، ماسكەۋ وسىنداي قادامدارعا بارۋ ارقىلى ەكى ماقساتتى كوزدەپ وتىر. ولاردىڭ ءبىرى - اۋعانستان ايماعىندا كۇش الىپ كەلە جاتقان «يسلام مەملەكەتى» تەررورلىق ۇيىمىنا قارسى «تاليبان» قوزعالىسىن ايداپ سالۋ. ال ەكەنشىسى - اۋعان جەرىندەگى ناتو اسكەري وپپەراتسيالارىنا كەدەرگى كەلتىرۋ.

ماقالا «The Times»  گازەتىندە جارىق كورە سالىسىمەن رف سىرتقى ىستەر مينيسترلىگى  اتالمىش جاعدايعا بايلانىستى بىردەن قارسى مالىمدەمە جاساعان. رەسەي ءسىم تاراتقان اقپارات بويىنشا، ۇلىبريتانيالىق «The Times» باسىلىمى جاريالاعان ماقالا تولىقتاي جالعان ماتەريالدار نەگىزىندە قۇرىلعان. بۇنىڭ بارلىعى اۋعانستانداعى ناتو اسكەرىنىڭ ساتسىزدىكتەرىن جاسىرۋ جانە حالىق نازارىن وزگە دۇنيەگە اۋدارۋ.

ەستەرىڭىزگە سالايىق، بۇعان دەيىن ناۋرىز ايىندا ناتو-نىڭ ەۋروپاداعى بىرىككەن كۇشتەر باسشىسى كەرتي سكاپاروتتي: «رەسەي جاسىرىن تۇردە «تاليبان» قوزعالىسىن قولداپ وتىرۋى مۇمكىن» - دەپ مالىمدەگەن بولاتىن.

“The Qazaq Times”