ۆلاديمير پۋتين سوورونباي جەەنبەكوۆتى قۇتتىقتادى

رەسەي پرەزيدەنتى ۆلاديمير پۋتين سوورونباي جەەنبەكوۆتى قۇتتىقتادى - دەپ حابارلايدى كرەمل ءباسپاسوز قىزمەتى.

ۆلاديمير پۋتين سوورونباي جەەنبەكوۆكە جىبەرگەن قۇتتىقتاۋ تەلەگارامماسىندا: «سايلاۋ قورىتىندىسى ءسىزدىڭ ەل اراسىندا بەدەلدى ازامات ەكەنىڭىزدى دالەلدەدى. وسى سايلاۋدا ەل حالقى ءسىزدىڭ ساياسي جانە الەۋمەتتىك-ەكونوميكالىق تۇرعىدا قىرعىزستاننىڭ دامۋىنا قوسقان ۇلەسىڭىزدى شىن مانىندە باعالادى. ءبىز دە ءسىزدىڭ رەسەي فەدەراتسياسى مەن قىرعىزستان رەسپۋبليكاسى اراسىنداعى دوستىق قارىم-قاتىناستى دامىتۋعا قوسقان ۇلەسىڭىزدى جوعارى باعالايمىز جانە قۇرمەتتەيمىز» - دەلىنگەن. ال سوڭعى كەزدەرى قىرعىز بيلىگىمەن قارىم-قاتىناسى دۇرىس بولماي جۇرگەن نۇرسۇلتان نازارباەۆ جەەنبەكوۆتى ءالى قۇتتىقتاماعان.

ەستەرىڭىزگە سالايىق، قازان ايىنىڭ 15-ءسى كۇنى قىرعىزستاندا پرەزيدەنت سايلاۋى ءوتىپ، بيلىك پارتياسى اتىنان قاتىسقان سوورونباي جەەنبەكوۆ 54,24 پايىز داۋىس جيناپ جەڭىسكە جەتكەن بولاتىن. ال ونىڭ باستى قارسىلاسى «رەسپۋبليكا اتا-جۇرت» پارتياسىنىڭ وكىلى ومىربەك بابانوۆ نەبارى 33,47 پايىز داۋىس جيناعان.

“The Qazaq Times”