بۇۇ تابيعي اپاتتاردىڭ جىل وتكەن سايىن كوبەيەتىنىن ايتىپ، دابىل قاقتى

فرانتسيا جانە قىتاي اقپاراتتىق اگەنتتىكتەرىنىڭ حابارلاۋىنشا، بىرىككەن ۇلتتار ۇيىمىنىڭ 13 قازان كۇنى مالىمەتىندە، جىل سايىن الەمدە كەم دەگەندە 14 ملن ادامنىڭ تابيعي اپات سالدارىنان باسپاناسىز قالاتىنىن حابارلاعان. بۇۇ كورسەتكەن ستاتيستيكالىق مالىمەتتەرگە قاراعاندا سوڭعى جىلدارى جەر شارىندا تابيعي اپاتتار جيىلەي تۇسكەن، ءارى بۇل جىل وتكەن سايىن ارتۋى مۇمكىن ەكەن. بۇل تۋرالى «People» باسىلىمى ءوزىنىڭ رەسمي سايتىندا حابارلادى.

حابارلامادا بىرىككەن ۇلتتار ۇيىمىنىڭ بايانداماسىندا جاھاندىق جىلىنۋدىڭ تابيعي اپاتتاردىڭ ۇلعايۋىنا ىقپال ەتەتىن نەگىزگى فاكتور ەكەنىن كورسەتىلمەگەن. الايدا، جەر سىلكىنىستەرى، تسۋنامي، سۋ تاسقىنى جانە داۋىل قاتارلى اپاتتاردىڭ الەم حالقىنا باستى قاتەر بولىپ تۇرعانىن ايتقان. بۇۇ وسى مالىمەتتەرمەن بىرگە بۇدان كەيىندە بۇنداي اپاتتاردىڭ كوبەيە تۇسەتىنىن ەسكەرتتى.

ءبىز ءومىر ءسۇرىپ وتىرعان ازيا قۇرلىعى قازىرگى كەزدە تابيعي اپاتتاردىڭ ەڭ بەلسەندى ماتەريگى سانالادى. ال، بۇل قۇرلىقتا الەم حالىق سانىنىڭ 60 پايىزىنا جۋىعى ءومىر سۇرەدى. ءبىر عانا ءۇندىستاننىڭ وزىندە تابيعي اپاتتار سالدارىنان جىلىنا 2,3 ملن ادام باسپاناسىز قالۋدا. بۇۇ مالىمدەمەسىندەگى ساناققا باسپانامەن قايتالاي قامتاماسىز ەتىلگەن تۇرعىندار قوسىلمايدى. دەمەك، جاعداي بۇل شامادان دا اۋىر دەۋگە بولادى.

الەمدىك قاۋىمداستىق بارلىق ەلدەردى تابيعي اپاتتاردان بولاتىن قاۋىپ-قاتەردى ازايتۋ ءۇشىن بىرلەسىپ جۇمىس ىستەۋگە شاقىرادى.

“The Qazaq Times”