2017 جىلدىڭ قاڭتار-قىركۇيەك ايىندا مەملەكەتتىك بيۋدجەتكە تولەنگەن تولەمدەر مەن سالىق تۇسىمدەرى 4,9 ترلن تەڭگەدەن استى. 

2016 جىلدىڭ سايكەس كەزەڭىمەن سالىستىرعاندا (4,6 ترلن تەڭگە) تۇسىم 8,2%-عا وسكەن.

مەملەكەتتىك كىرىستەر كوميتەتىنىڭ مالىمەتىنشە، سالىقتى ەڭ كوپ تولەگەن وڭىرلەر الماتى (1,2 ترلن تەڭگە), استانا (692 ملرد تەڭگە) جانە اتىراۋ وبلىسى (683,1 ملرد تەڭگە).

اقتوبە وبلىسى مەملەكەتتىك بيۋدجەتكە 247 ملرد تەڭگە، قاراعاندى وبلىسىنان 237,5 ملرد تەڭگە، وڭتۇستىك قازاقستان وبلىسىنان 229,5 ملرد تەڭگە، شىعىس قازاقستان وبلىسىنان 225 ملرد تەڭگە، الماتى وبلىسىنان 226 ملرد تەڭگە تۇسكەن.

بۇدان بولەك،   سالىق پەن تولەمدەر كولەمى ماڭعىستاۋ وبلىسىندا 229,4 ملرد تەڭگەگە، پاۆلودار وبلىسىندا 165,4 ملرد تەڭگەگە، باتىس قازاقستان وبلىسىندا  166,4 ملرد تەڭگەگە، قوستاناي وبلىسىندا 112,5 ملرد تەڭگەگە جەتكەن.

اقمولا وبلىسىنان بيۋدجەتكە 86,4 ملرد تەڭگە، قىزىلوردا وبلىسىنان 72,6 ملرد تەڭگە، جامبىل جانە سولتۇىستىك قازاقستان وبلىستارىنان  58,8 ملرد تەڭگە جانە  54,8 ملرد تەڭگە اۋدارىلعان.

“The Qazaq Times”