ترامپ قىتايدىڭ جاڭا شاراسىنا ەكى ەسە جاۋاپ بەردى. فوتو: VOA.

اقش پەن قىتاي اراسىنداعى ساۋدا سوعىسى جاڭا كەزەڭگە اياق باستى. قۇراما شتاتتاردىڭ پرەزيدەنتى دونالد ترامپ قىتايعا قارسى قاتاڭ شارالاردى قولعا العانىن ءبىلدىردى. وتكەن اپتا سوڭىندا ول ءوزىنىڭ الەۋمەتتىك جەلىدەگى پاراقشاسىندا مالىمدەمە جاساپ، امەريكالىق كومپانيالارعا قىتايدان شىعىپ، اقش-قا قايتۋدى بۇيىردى.

"بارلىق امەريكالىق كومپانيالار قىتايدان شىعىپ، جاڭا تۇراق تابۋعا مىندەتتى. ولار اقش-قا قايتىپ ءوز ونىمدەرىن وسى ەلدە ءوندىرۋى كەرەك", – دەپ مالىمدەدى اقش پرەزيدەنتى ءوزىنىڭ "تۆيتتەر" پاراقشاسىندا.

ترامپ بۇل مالىمدەمەسىن قىتايدىڭ اقش تاۋارلارىنا قاراتقان جاڭا تاريفتەرىنەن كەيىن جاسادى. قىتاي وتكەن جۇمادا ەلىنە كىرەتىن 75 ملرد دوللار كولەمىندەگى اقش تاۋارىنا 5-10 پايىزدىق جاڭا كەدەندىك سالىق بەلگىلەگەن بولاتىن. بەيجىڭنىڭ جاڭا ەرەجەسى جەلتوقسان ايىندا رەسمي قولدانىلا باستايدى.

ارينە، قىتايدىڭ جاڭا تاريفتىك شاراسىنا ترامپ تەك امەريكالىق كومپانيالاردى كەرى قايتارۋمەن عانا جاۋاپ بەرگەن جوق. "اقش 1 قازاننان باستاپ قىتايدىڭ 250 ملرد دوللار كولەمىندەگى تاۋارىنا بەلگىلەنگەن ءتاريفتى 25 پايىزدان 30 پايىزعا دەيىن كوتەرەدى", – دەدى پرەزيدەنت ترامپ. بۇعان قوسا 1 جەلتوقساننان باستاپ قىتايدىڭ اقش-تاعى 10 پايىز سالىق سالىناتىن 300 ملرد دوللار قۇنىنا يە تاۋارلارىنا دا ءتاريفتى كوتەرىپ، 15 پايىزعا دەيىن جەتكىزەتىنىن بىلدىرگەن.

اقش پرەزيدەنتىنىڭ كەزەكتى شارالارى قىتايدىڭ جاڭا تاريف شاراسىنا ەكى ەسە جاۋاپ بەرۋ رەتىندە باعالاندى. الايدا، اقش-تىڭ ساۋدا پالاتاسى جاعىنان ترامپتىڭ ساياساتىنا اشىق نارازىلىقتار دا كۇشەيدى. قالاي بولعاندا دا وتكەن اپتانىڭ سوڭىندا اقش-قىتاي سوعىسى جاڭا كەزەڭگە اياق باستى.

“The Qazaq Times”