جىلۋ ماۋسىمى كەزىندە قازاقستاندا كومىر باعاسى بىردەن 7%-عا قىمباتتاعان. بۇل تۋرالى EnergyProm ساراپتاما اگەنتتىگى حابارلادى. ساراپشىلاردىڭ سوزىنشە، باعانىڭ قىمباتتاۋى بۇدان كەيىن دە جالعاسا بەرەدى. 

ءبىر جىل ىشىندە باعانىڭ ءوسىمى 19 پايىزدى قۇراعان. ەسكەرەتىن جايت كومىر مەن ليگنيت ءوندىرۋ 15 پايىزعا، ونىڭ ىشىندە جىلۋ ءۇشىن وندىرىلەتىن تاس كومىر 16 پايىزعا كوبەيگەن.

2017 جىلدىڭ قىركۇيەك ايىنداعى ناتيجە بويىنشا جىلۋ ماۋسىمى كەزىندە ءاربىر قازاقستاندىق ءبىر توننا كومىر ءۇشىن ورتاشا ەسەپپەن 11 مىڭ تەڭگە جۇمساعان جانە بۇل تامىز ايىنا قاراعاندا 6,6 پايىزعا جانە 2016 جىلدىڭ قىركۇيەك ايىمەن سالىستىرعاندا 18,9 پايىزعا جوعارى.

ەڭ جوعارى باعا اقتوبە قالاسىندا. مۇندا ءبىر توننا كومىر 14,5 مىڭ تەڭگەدەن ساتىلادى. سونداي-اق، كومىر قىمبات قالالاردىڭ ۇشتىگىنە استانا (14,2 مىڭ تەڭگە), ورال (14 مىڭ تەڭگە) كىرەدى.

بۇدان بۇرىن  قر ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ جانە باقىلاۋ كوميتەتى قازاقستانداعى كومىر باعاسىنىڭ قىمباتتاۋىن دەلدالداردىڭ ايلا-شارعىلارىمەن جانە تەمىر جول تاريفتەرىنىڭ قىمباتتاۋىمەن تۇسىندىرگەن.

الايدا ەنەرگەتيكا مينيسترلىگىنىڭ مالىمەتىنشە، قازاقستاندا كومىر تاپشىلىعى جوق. سەبەبى كومىر ءوندىرۋشى كومپانيالار وسى جىلدىڭ 9 ايىندا 75,3 ملن توننا كومىر ءوندىرىپ، ىشكى نارىققا 55,8 ملن توننا جەتكىزگەن، ونىڭ 40,5 ملن تونناسى ەنەرگيا ءوندىرۋشى كاسىپورىندارعا جەتكىزىلدى. كوممۋنالدىق-تۇرمىستىق قاجەتتىلىككە جانە حالىققا 8,0 ملن توننا بەرىلگەن.

ايتا كەتەتىن جايت، كومىر شاحتالارىنداعى باعا ايتارلىقتاي قىمباتتاماعان. مىسالى، سارىكول كومىر كەنىشىنىڭ ديرەكتورى قايرات مۋسين "جىل باسىنان بەرى ءبىر توننا كومىردىڭ ساتىلۋ باعاسى وزگەرمەگەنىن جانە 3900 تەڭگە بولعانىن" ايتادى. كومىرشىلەردىڭ سوزىنشە، كۇننىڭ ەرتە سۋىتۋىنا بايلانىستى دەلدالدار باعانى ەش نەگىزسىز كوتەرگەن.

ايتا كەتەيىك، قازان ايى باستالعالى بەرى قازاقستاندا مۇناي ونىمدەرىنىڭ تاپشىلىعىنا قاتىستى داۋلار كوبەيىپ، ءتىپتى كومىر تاپشىلىعى دا بايقالا باستادى. كەيبىر ساراپشىلار مۇنى مانيپۋلياتسيامەن بايلانىستىرىپ وتىر.

“The Qazaq Times”