كاتالونيا باسشىسى تاۋەلسىزدىك جاريالاۋدى كەيىنگە قالدىرۋدى ۇسىندى

كاتالونيا ۇكىمەتىنىڭ باسشىسى كارلەس پۋچدەمون جەرگىلىكتى پارلامەنتكە تاۋەلسىزدىكتى جاريالاماي قويا تۇرۋ تۋرالى ۇسىنىس جاسادى. ونىڭ سوزىنشە، الدىمەن اۆتونوميا يسپانيادان شىعۋ تۋرالى مادريدپەن بولاتىن ديالوگتى رەتكە كەلتىرۋ كەرەك. بۇل تۋرالى ۆۆس اگەنتتىگى حابارلادى.

كاتالونيا باسشىسى اتاپ وتكەنداي 1 قازاندا وتكەن رەفەرەندۋم كەزىندە اۆتونوميا تاۋەلسىز مەملەكەت بولۋ ءۇشىن حالىق تاراپىنان ماندات العان.

"جەرگىلىكتى ميلليونداعان تۇرعىن كاتالونيا ءۇشىن جالعىز شەشىم "تاۋەلسىز مەملەكەت بولۋ" دەپ ەسەپتەيدى", - دەدى پۋچدەمون.

ۇكىمەت باسشىسى سويلەگەن سوزىندە كاتالونيا "ەشبىر قاۋىپ-قاتەردى جوسپارلامايتىنىن، تەك شيەلەنىستى باسەڭدەتۋدى قالايتىنىن" اتاپ ءوتتى.

ء"بىز ەشقانداي قىلمىسكەر نەمەسە اقىلسىز ادامدار ەمەسپىز، ءبىز تەك داۋىس بەرۋگە مۇمكىندىك بەرۋدى سۇراپ وتىرمىز. ءبىزدىڭ يسپانيا مەن يسپاندىقتارعا قارسى ەشتەڭەمىز جوق", - دەدى ول.

ۆۆس ءجۋرناليسىنىڭ مالىمەتىنشە، سەيسەنبى كۇنى پۋچدەمون مالىمدەمە جاسايتىن ۋاقىتتا بارسەلونادا قاۋىپسىزدىك شارالارى كۇشەيگەن. ال تۇرعىندار  "دەموكراتيا" دەپ جازىلعان پلاكاتتار مەن ەستەلادتار (تاۋەلسىزدىك جالاۋشاسى) ۇستاپ، كاتالونيا پارلامەنتى عيماراتىنىڭ الدىنا جينالعان.

ايتا كەتەيىك، 1 قازاندا كاتالونيا ازاماتتارىنىڭ 43,2 پايىزى قاتىسقان رەفەرەندۋمدا داۋىس بەرگەندەردىڭ 90 پايىزى تاۋەلسىزدىكتى قولدايتىندارىن بىلدىرگەن. وسىدان كەيىن يسپانيانىڭ كونستيتۋتسيالىق سوتى كاتالونيا پارلامەنتىنىڭ تاۋەلسىزدىك تۋرالى جينالىسىن توقتاتۋعا بۇيرىق بەرگەن. كونستيتۋتسيالىق سوت بۇيرىعى يسپانيا پارتيالارىنىڭ بىرجاقتى تاۋەلسىزدىك جاريالاۋ ءىسىن توقتاتۋ تۋرالى ارىز-شاعىمدارىنا بايلانىستى تۇسىرىلگەن.

“The Qazaq Times”