فوتو: krimchel

وسى اپتا نوبەل سىيلىعىنىڭ لاۋرەاتتارى بەلگىلى بولادى. جاھاندىق دەڭگەيدەگى سىيلىق جىل سايىن ايگىلى عىلىمي تاجىريبەلەر، توڭكەرىستىك جاڭالىقتار جاساپ، حالىقارالىق ماسەلەلەردى شەشۋگە، مادەنيەت جانە قوعامنىڭ دامۋىنا ايتارلىقتاي ۇلەس قوسۋعا ەڭبەك سىڭىرگەن ادامدارعا تابىستالادى.

بىلتىر يادرولىق قارۋدى ليكۆيداتسيالاۋمەن اينالىساتىن حالىقارالىق كومپانيا جەڭىمپاز اتانعان. «Time» باسىلىمنىڭ مالىمەتىنشە، وسلوداعى نوبەل كوميتەتىنىڭ مالىمەتىنشە، بيىل بەيبىت الەمدى قولداۋ اتالىمى بويىنشا جالپى سانى 331 ادام ۇمىتكەرلىككە ۇسىنىلعان. پرەميا جەڭىمپازدارى تەك جۇما كۇنى بەلگىلى بولادى، بىراق شەتەلدىك Ladbrokes بۋكمەكەر ورتالىعىنىڭ «ىزىمەن» نوبەل سىيلىعىنىڭ وسى اتالىم بويىنشا فاۆوريتتەرىنە توقتالىپ وتكەنىمىز ارتىق بولماس.

دونالد ترامپ

ون سەگىز رەسپۋبليكالىق زاڭ شىعارۋشىلار مامىر ايىندا نوبەل كوميتەتىنە اقش كوشباسشىسى دونالد ترامپتى نوبەل سىيلىعىنا تاعايىنداۋ تۋرالى ۇسىنىس ءبىلدىرىپ، حات جولداعان. ولار ترامپتىڭ بيلىككە كەلگەن ساتىنەن باستاپ امەريكا مۇددەسى مەن الەمدىك جاعدايلاردى رەتتەۋ ماقساتىندا اتقارعان ەڭبەكتەرىن نازارعا الىپ وتىر. ماسەلەن، ترامپ «اراسىنان الا مىسىق وتكەن» وڭتۇستىك جانە سولتۇستىك كورەيا شەكاراسىن رەتتەۋگە اتسالىسىپ، جاھاندىق ماسەلەگە اينالعان يادرولىق قارۋدى جويۋدى باستى نازاردا ۇستادى. قىتاي ۇكىمەتىنىڭ ەتنيكالىق ۇلتتاردى جازىقسىز ازاپتاپ، ادام قۇقىعىن اشىقتان-اشىق تاپتاپ وتىرعانىن ماسەلە رەتىندە كوتەردى جانە قحر-عا سۇراپىل سانكتسيالار جولدادى. ترامپتىڭ وسى سىندى «ساياسي ەڭبەگىن» نازارعا العان كوميتەت باسشىلارى ونى نوبەل سىيلىعىنا ۇمىتكەرلەردىڭ قاتارىنا قوسقان. اقش تاريحىندا پرەزيدەنتتەر اراسىنان باراك وباما قىزمەتكە كەلگەنگە دەيىن ياعني 2009 وسى پرەميانى يەلەنگەن.

كيم چەن ىن جانە مۋن چجە ين

كورەيا حالىق دەموكراتيالىق رەسپۋبليكاسى مەن وڭتۇستىك كورەيا كوشباسشىلارى كيم چەن ىن، مۋن چجە ين بەيبىتشىلىكتىڭ نوبەل سىيلىعىنىڭ لاۋرەاتى اتانۋعا ۇمىتكەر. دەمەك، ساياساتتاعى ۇشتاعان: ترامپ، مۋن جانە كيم جۇلدەنىڭ باستى فاۆوريتتەرى.

2017 جىلى سولتۇستىك كورەيانىڭ يادرولىق قارۋ سىناعى مەن زىمىراندارىنىڭ تولقىنى ەكى ەل اراسىنداعى قارىم-قاتىناستى قۇلدىراتتى. 1950-53 جىلدارداعى كورەي سوعىسىنان باستاۋ العان كيكىلجىڭ ءبىراز ۋاقىتقا سوزىلدى. اراعا ءبىراز ۋاقىت سالىپ، ساياسي-ديپلوماتيالىق، ەكونوميكالىق كورنفرونتاتسيانىڭ الدىن الۋ ءۇشىن قوس مەملەكەتتىڭ يادرولىق قارۋسىزدانۋ باعىتىندا جاڭا قادام جاسادى. وتكەن ايدا كيم شەتەلدىك ينسپەكتورلاردىڭ باقىلاۋىمەن دەنۋكلەاريزاتسياعا ۋادە بەردى. البەتتە، بۇۇ-نىڭ كيم رەجيمىنە قاتىستى «ادامزاتقا قارسى قىلمىس ۇيىمداستىرۋشى» دەگەن تەرىس پىكىرىن نازاردان تىس قالدىرا المايمىز. دەگەنمەن، ەكى ەل باسشىسى 2018 جىلعى نوبەل سىيلىعىنىڭ ايقىن فاۆوريتتەرى اتارىپ وتىر.

كارلەس پۋچدەمون

اتالعان تىزىمدە ەلىنەن قۋىلعان كاتالونيا باسشىسى كارلەس پۋچدەمون دا بار. پۋچدەموندى تىزىمنەن كورگەندەردىڭ پىكىرى ەكىگە جارىلدى: ءبىرى ونىڭ «قاشقىن» ەكەنىن ايتسا، ەندى ءبىرى»ول ەلى ءۇشىن ەڭبەك ەتكەن قاھارمان» دەيدى. كاتالونيانىڭ «تاۋەلسىزدىك تۋرالى» بەيرەسمي رەفەرەندۋمىنىڭ نومينالدى باسشىسى پۋچدەمون وتكەن جىلدىڭ قازان ايىندا يسپان بيلىگىنىڭ تۇتقىنداۋىنا جول بەرمەۋ ءۇشىن بەلگياعا كەتكەن. بىراق بۇل مەملەكەت ءالى دە يسپانيا تاراپىنان قيىندىق كورىپ وتىر.

ريم پاپاسى فرانتسيسك

كۇنى بۇگىنگە دەيىن بىردە-ءبىر ريم پاپاسى الەمدىك نوبەل سىيلىعىن ۇتپاعان. بىراق فرانتسيسك 2013 جىلدان بەرى ۇمىتكەرلەر قاتارىنان بوي كورسەتىپ كەلەدى. سول جىلى وعان «ادامداردى ادال جولعا سالۋدا تەر توكەنى» ءۇشىن «جىل ادامى» اتاعى بەرىلدى. بۇل جولى CNN ساۋالناماسى بويىنشا ول 48% داۋىس جيناعان.

"The Qazaq Times"