وسى اپتادا ەل نازارىن وزىنە اۋدارتقان ەلەۋلى وقيعالار

قازاقستان مەن دۇنيەجۇزىندە قازاننىڭ 2-ءسى مەن 7-ءسى كۇندەرى ارالىعىندا قانداي وقيعالار بولدى؟ ءبىز بۇگىن وسى  اپتاداعى ەل نازارىن وزىنە اۋدارتقان ەلەۋلى وقيعالارعا قىسقاشا توقتالامىز.

وسى اپتا تۇركيا پرەزيدەنتى رەجەپ تايىپ ەردوعاننىڭ: «تۇركياعا ەۋرووداققا مۇشە بولۋدىڭ قاجەتى جوق» - دەگەن مالىمدەمەسىمەن باستالدى. بۇل ارينە كوپشىلىك جۇرتقا جاڭالىق بولماۋى مۇمكىن. ويتكەنىساراپشىلار ەردوعاننىڭ بۇل سوزىنە «1963 جىلدان بەرى ەۋرووداققا كىرە الماي كەلە جاتقان ادامنىڭ جان ايقايى» دەپ باعا بەردى. بىراق تاياۋ شىعىس پەن جالپى الەمدەگى گەوساياسي جاعدايلاردىڭ ۋشىعىپ تۇرعانىن ەسكەرسەڭىز بۇل جاي ءسوز ەمەس ەكەنىن تۇسىنەسىز. ەردوعانىڭ ەۋرووداققا قاراتا ايتقان سوزىمەن قاتار وسى اپتا سولتۇستىك كورەيا باسشىسى كيم جوڭ ۋننىڭ اعاسى كيم جوڭ نامنىڭ ولىمىنە بايلانىستى سوت وتىرىسىمەن باستالدى. مالايزيا سوتى كيم جوڭ نامنىڭ ولىمىنە قاتىسى بار دەلىنگەن يندونەزيا ازاماتشاسى سيتي ايشا مەن ۆەتنامدىق زوان تحي حىونگ ىسىنە بايلانىستى العاشقى سوت وتىرىسىن وتكىزدى.

ال الەمنىڭ ەكىنشى ءبىر شەتىندە مالايزياداعى سوتتان كەيىن ەكى كۇننەن سوڭ قازاننىڭ 4-ءى كۇنى ەۋروپارلامەنت دەپۋتاتتارى كاتالونيادا وتكەن رەفەرەندۋمعا بايلانىستى وتىرىس وتكىزدى. وندا ولار قازان ايىنىڭ 1-ءى كۇنى كاتالونيادا تاۋەلسىزدىك الۋعا بايلانىستى ەشكىمنىڭ كەلىسىمىنسىز وتكەن رەفەرەندۋمدى قاتاڭ سىنعا الىپ، يسپانيا بيلىگىنىڭ اتالمىش جاعدايلارعا بايلانىستى حالىققا كۇش قولدانعانىن ەشقانداي قيسىنعا كەلمەيتىندىگىن ايتقان.

ەۋروپا جۇرتشىلىعى وسى اي باستالعالى كاتالونيا «جىرىمەن» جۇرگەندە، قازان اينىڭ 5-ءسى كۇنى رەسەي پرەزيدەنتى ۆلاديمير پۋتين اراعا بەس جىل سالىپ تۇركىمەنستانعا رەسمي ءىس-ساپارمەن باردى. وندا ول بەس جىل ىشىندەگى وتكەن-كەتكەندى تۇگەندەپ، تۇركىمەنستان باسشىسى قۇربانعۇلى بەردىمۇحامەدوۆتى «الەكساندر نەۆسكي» وردەنىمەن ماراپاتتادى. كوپتەگەن ساراپشىلار ۆلاديمير ءپۋتيننىڭ بۇل جولعى ءىس-ساپارىنا «تۇركىمەنستاننان ايىرىلىپ قالماۋدىڭ جولدارىن قاراستىرۋ» - دەگەن باعا بەردى.

بۇدان بولەك وسى اپتا تاجىكستان پرەزيدەنتى ەمومالي راحموننىڭ تۋعان كۇنىن «ۇلت كۇنى» دەپ اتاۋ، «يسلام مەملەكەتى» سودىرلارى تۇتقىنداعى رەسەي ساربازدارىن ءولتىردى، وش قالاسىندا بابانوۆ جاقتاستارى سوققىعى جىعىلدى دەگەن سىندى قازاق قوعامىندا قىزۋ تالقىلانعان وقيعالارعا تولى بولدى.

“The Qazaq Times”