حالىقارالىق ادام قۇقىعىن قورعاۋ ۇيىمى (HRW) «يران سۇرياداعى تەرروريزمگە قارسى كۇرەستە اۋعانستاندىق بالالاردى پايدالانىپ وتىر» دەپ جازعىرعان بولاتىن. بۇنى يران جاق قابىلداي الماي، حالىقارالىق ادام قۇقىعىن قورعاۋ ۇيىمىن اقش-تى جاقتاپ، يرانعا قارسى كوزقاراستا دەپ جازعىردى. بۇل تۋرالى سول ەلدىڭ «پارس.اقپارات» اگەنتتىگى رەسمي سايتىندا جازعان ەدى.

وتكەن اپتانىڭ سوڭىندا اتالعان ۇيىم مالىمەت تاراتىپ يراندا پانالاپ جۇرگەن اۋعانستاندىق ميگرانتتاردى «يران ۇكىمەتى سۇرياداعى سوعىسقا ايداپ سالىپ وتىر» دەپ ايىپتاعان بولاتىن. ايتالىق مالىمەتتە «اۋعانستاننان يرانعا پانالاي بارعان بالالاردى يرانعا كومەكتەسۋ ءۇشىن سۇرياداعى لاڭكەستەرگە قارسى كۇرەستە پايدالانعان» دەلىنگەن. وسىدان بۇرىن اقش مەملەكەتتىك دەپارتامەنتى يراندى ادام ساۋداسىمەن اينالىسقان دەگەن مالىمەتتەردى تاراتقان ەدى. بۇعان قارسى يران جاق «حالىقارالىق ادام قۇقىقتارىن قورعاۋ ۇيىمى يرانعا قارسى اقش-پەن استاسىپ وتىر» دەپ جازعىردى.

وسى اتالعان پىكىرلەرگە قارسى يران سىرتقى ىستەر مينيسترلىگى ارناۋلى جاۋاپ جولداعان. وندا بىلاي دەلىنگەن: «ادام ساۋداسىنىڭ نەگىزگى قاينارىن وزگە ەلدەرگە ناسىلدىك جانە لاڭكەستىك ارەكەتەر الىپ كىرۋدەن، وزگەلەردىڭ ساياساتىنا ارالاسۋشىلىقتان، شاپقىنشىلىق ساياساتتان ىزدەۋ كەرەك. وسىلاردان كەلىپ شىعاتىن ەلدەردى جاپپاي كۇيرەتىپ توزدىرعان سوعىستاردان ىزدەۋ كەرەك. وسىنىڭ كوبىن اقش پەن ونىڭ وداقتاستارى جاساپ وتىر». بۇل يران ءسىم ءباسپاسوز حاتشىسىنىڭ ءسوزى.

بۇل يران ۇكىمەتىنىڭ اقش پەن ادام قۇقىعىن قورعاۋ حالىقارالىق ۇيىمىنا قارسى ايتقان ءۋاجى بولىپ وتىر. بۇل پىكىردەن وزگە اقش پەن يران اراسىنداعى قايشىلىق بارعان سايىن ءورشىپ كەلەدى. يران اقش-تىڭ سىرتقى ساياساتىمەن مۇلدە كەلىسە الماستاي، قاتتى بەكىمدەرگە كەلۋگە دەيىن باردى.

“The Qazaq Times”