نيكولاس مادۋرو يسپانيا بيلىگىن «ديكتاتۋرا» دەپ اتادى

ۆەنەسۋەلا پرەزيدەنتى نيكولاس مادۋرو كاتالونياداعى رەفەرەندۋمعا جينالعان حالىققا كۇش قولدانۋدى "رەپرەسسيا", ال يسپانيا بيلىگىن "ديكتاتۋرا" دەپ اتادى. بۇل تۋرالى APF اقپاراتتىق اگەنتتىگى جازدى. 

نيكولاس مادۋرو VTV تەلەارناسىنا بەرگەن سۇحباتىندا: "مەن كاتالونيا، يسپانيا نە وزگە قانداي مەملەكەت بولماسىن، ونىڭ ىشكى ىستەرىنە ارالاسپايمىن. بىراق كۇنى كەشە بولعان وقيعا بەيبىت حالىققا قارسى كۇش قولدانۋدىڭ جان تۇرشىگەرلىك كورىنىستەرىن قۇپتامايمىن", -دەپ مالىمدەدى.

نيكولاس مادۋرونى الەمنىڭ بىرنەشە كوشباسشىلارى مەن ەل وپپوزيتسياسى ۆەنەسۋەلادا ءساۋىر ايىنان بەرى جالعاسقان حالىق پەن بيلىكتىڭ قاقتىعىسى كەزىندەگى پوليتسيانى جاقتاعان ارەكەتى ءۇشىن ايىپتاپ، "ديكتاتور" دەگەن اتاۋ بەرگەن ەدى. 125 ادام قازا تاپقان ۆەنەسۋەلاداعى كوتەرىلىس كەزىندە حالىققا قارسى كۇش قولدانعان قاۋىپسىزدىك قىزمەتكەرلەرىن قولداعان مادۋرو بۇل ارەكەتىن: ء"بىزدىڭ ەلدەگى كوتەرىلىسكە شىققان حالىق قارۋلانعان بولدى. ال كاتالوندىقتار بەيبىت تۇردە رەفەرەندۋم وتكىزدى. ەكەۋىنىڭ ايىرماشىلىعى ۇلكەن", - دەپ ءتۇسىندىردى.

يسپانيا مەن ۆەنەسۋەلانىڭ قارىم-قاتىناسى جاقسى دەۋگە كەلمەيدى. ويتكەنى يسپانيا نيكولاس مادۋرونىڭ ۇلتتىق اسسامبلەيا قۇرۋ تۋرالى يدەياسىنا قارسى كوتەرىلگەن حالىقتىڭ پىكىرىن ەسكەرمەگەنى ءۇشىن،  ۆەنەسۋەلاعا قارسى سانكتسيالار ەنگىزۋدى ۇسىنعان بولاتىن.

“The Qazaq Times”