فوتو: informat.com.ua

مالايزيادا سولتۇستىك كورەيا باسشىسى كيم جوڭ ۋننىڭ (كيم چەن ىننىڭ) اعاسى كيم جوڭ نامنىڭ ولىمىنە قاتىستى سوت وتىرىسى باستالدى - دەپ حابارلايدى نەمىس تولقىنى اقپارات اگەنتتىگى.

بۇگىن مالايزيانىڭ شاح-الام قالاسىندا كيم جوڭ ۋننىڭ اعاسى كيم جوڭ نامدى ءولتىردى دەگەن كۇدىكپەن ۇستالعان 25 جاستاعى يندونەزيا ازاماتشاسى سيتي ايشا مەن 29 جاستاعى ۆەتنامدىق زوان تحي حىونگتىڭ سوت وتىرىسى باستالعان. ايىپتاۋشى تاراپتىڭ سوزىنشە، اقپان ايىنىڭ 13-ءى كۇنى كۋالا-لۋمپۋر قالاسىنىڭ اۋەجايىندا سيتي ايشا مەن زوان تحي حىونگ كيم جوڭ نامنىڭ بەتىنە جۇيكەنىڭ دارمەنسىز بولۋىنا اكەپ سوعاتىن VX-فوسفوروورگانيكالىق سۇيىقتىق شاشىپ كەتكەن. سالدارىنان كيم جوڭ نام اۋرۋحاناعا بارار جولدا كوز جۇمعان.

زوان تحي حىونگ پەن سيتي ايشا

ناۋرىز ايىندا مالايزيا قۇقىق قورعاۋ ورگاندارى اتالمىش ءىز بويىنشا قىلمىستىق ءىس قوزعاعان. تەكسەرۋ كەزىندە كيم جوڭ نامدى ولتىرۋگە سولتۇستىك كورەيا سىرتقى ىستەر مينيسترلىگى مەن قورعانىس مينيسترلىگىنىڭ جوعارى لاۋازىمدى قىزمەتكەرلەرى تاپسىرىس بەرگەندىگى انىقتالعان. بىراق وسى ۋاقىتقا دەيىن مالايزيا بيلىگى ولاردىڭ ەشقايسىسىن ۇستاي الماعان.

تەرگەۋ بارىسىندا كۇدىكتىلەر اۋەجايدا بولعان وقيعانى «تەلەۆيزيالىق باعدارلاماعا ءتۇسىپ جاتىرمىز دەپ ويلادىق» دەپ تۇسىندىرگەن. ءتىپتى كۇدىكتىلەردىڭ ءبىرى سيتي ايشا وسى ءىسى ءۇشىن 85 ەۋرو گوناراردا العاندىعىن ايتقان. بىراق ەكى كۇدىكتى دە ءوز كىنالارىن مويىنداماعان. ەگەردە مالايزيا سوتى يندونەزيا مەن ۆەتنام ازاماتشالارىن كىنالى دەپ تانيتىن بولسا، وندا ولار ءولىم جازاسىنا كەسىلەتىن بولادى.

“The Qazaq Times”