قازاقستان باسەكەگە قابىلەتتى ەلدەر رەيتينگىندە تومەندەپ كەتتى

قازاقستان دۇنيە جۇزىلىك ەكونوميكالىق فورۋمنىڭ (دەف) جاھاندىق باسەكەگە قابىلەتتىلىك يندەكسى تۋرالى رەيتينگىندە  57-ءشى ورىنعا يە بولىپ،ءتورت ساتىعا تومەن ءتۇستى. تىزىمدە 137 ەلدىڭ اتى كورسەتىلگەن. بۇل تۋرالى ۇيىمنىڭ بايانداماسىندا ايتىلدى. 

قازاقستاننىڭ ءتۇرلى كورسەتكىشتەر بويىنشا ورتاشا بالى 4,35 (2016 جىلى 4,41 بالمەن 53 ورىندا بولعان) بولدى. قازاقستانمەن قاتارلاس تۇرعان ەلدەر فيليپپين (56-ورىن) مەن رۋاندا ەلى (58-ورىندا). ازەربايجان رەيتينگ بويىنشا 35-ءشى ورىندا، ال رەسەيدىڭ كورسەتكىشى ءۇش ساتىعا تومەندەپ، 38-ءشى ورىندا تۇر.

ءبىرىنشى ورىندا شۆەيتساريا. الدىڭعى بەستىككە اقش، سينگاپۋر، نيدەرلاندى، گەرمانيا كىرگەن.

رەيتينگ  قۇراستىرۋشىلاردىڭ سوزىنشە، قازاقستاندا بيزنەستى جۇرگىزۋدەگى نەگىزگى پروبلەمالار قارجىلاندىرۋ، سىبايلاس جەمقورلىق، جۇمىسشى كۇشىنىڭ بولماۋى، ينفلياتسيا، سالىقتىق نورمالار، تيىمسىز  مەملەكەتتىك بيۋروكراتيا سالدارىنان تۋىندايدى ەكەن.

ايتا كەتەيىك، قازاقستاننىڭ اتالعان رەيتينگتەگى ناتيجەسى 2015-2016 جىلدارى جاقسى بولعان. ول كەزدە قازاقستان 140 ەلدىڭ ىشىندە 42 ورىندا بولعان.

 “The Qazaq Times”