سولتۇستىك كورەيا باسشىسى: ترامپ پرەزيدەنت بولۋعا جارامايدى

اقش پرەزيدەنتى دونالد ترامپتىڭ بۇۇ ماجىلىسىندە سولتۇستىك كورەيا تۋرالى ايىپتاۋ سوزىنە سولتۇستىك كورەيا باسشىسى كيم جوڭ ۋن (كيم چەن ىن/Kim Jong Un) بۇگىن تاڭەرتەڭ ءوز جاۋابىن قايتاردى. ول سوزىندە وسىعان دەيىن بولىپ كورمەگەن قاتاڭ شارالار قولدانۋدى قاراستىرىپ جاتقانىن ايتتى. ەستەرىڭىزدە بولسا، ترامپتىڭ بۇۇ ماجىلىسىندە «اقش ءوزىن جانە وداقتاستارىن قورعاۋعا تۋرا كەلسە، سولتۇستىك كورەيانى تولىعىمەن جويىپ جىبەرەدى» دەگەن بولاتىن. بۇل تۋرالى «The Wall Street Journal» باسىلىمى حابارلاپ وتىر.

سولتۇستىك كورەيانىڭ ەڭ جوعارى باسشىسى كيم جوڭ ۋن سول ەلدىڭ ورتالىق اقپارات اگەنتتىگى ارقىلى مالىمدەمەسىن تاراتتى. ول سوزىندە: «ترامپتىڭ بۇل ايتقاندارى وتپەن ويناعانمەن بىردەي. ول پرەزيدەنت بولۋعا جارامايدى. بۇۇ ماجىلىسىندەگى ءسوزى اقىلسىز كوشباسشىنىڭ جاساعان اقىماقتىعى»، – دەپ باعالادى. سونداي-اق، ول اقش پرەزيدەنتى سويلەگەن سوزىندە مۇنشالىق شەكتەن شىققانى ونىڭ قانداي دا ءبىر قارىمتا شابۋىل كۇتىپ تۇرعانىن بىلدىرەتىنىن اتاپ ءوتتى. «ترامپ باستاپقىدا قانداي جاۋاپ كۇتكەنىن بىلمەيمىن، بىراق وعان ويلاماعان جاۋاپ قايتارىلادى»، – دەدى كحدر باسشىسى.

كيم جوڭ ۋن ناقتى قانداي قادامدار جاسالاتىنى تۋرالى اشىپ ايىتپادى. الايدا، ول اقش-تى اقىلىنان الجاستىراتىنداي جاۋاپ بەرەتىنىن جەتكىزدى. ونىڭ بۇل سوزدەرى الدا كورەي تۇبەگىندە جالعاستى زىمىران جانە يادرولىق سىناقتاردىڭ بولاتىنىن بىلدىرەدى.

ترامپ ءوزىنىڭ بۇۇ باس اسسامبلەياسىنداعى العاشقى سويلەگەن سوزىندە، سولتۇستىك كورەيا باسشىسىن «زىمىران ادام» دەپ اتاعان ەدى. وعان قوسا «ولار وزدەرىن ولىمگە يتەرىپ وتىر»، «ناعىز سۇمىراي رەجيم» دەگەن سەكىلدى لاقاپتار مەن ايىپتاۋلاردى ايتقان ەدى.

كيم جوڭ ۋن ءسوز سوڭىندا قۇراما شتاتتارىنىڭ پرەزيدەنتى بىرىككەن ۇلتتار ۇيىمىنىڭ ماجىلىسىندە تۇرىپ، ەگەمەندى مەملەكەتتى تولىعىمەن جويىپ جىبەرەتىنىن ايتقان بولسا، بۇل تارتىپسىزدىكتىڭ بايقاعان قالىپتى ويلاۋ قابىلەتى بار ادامدارعا دا ساقتىق پەن تىنىشتىقتى ەسكەرۋ كەرەك ەكەنىن ايتتى. ونىڭ ايتقىسى كەلگەنى «وزگە ەلدەر دە ترامپ سىندى اقش پرەزيدەنتىنەن ساقتانۋ كەرەك» دەگەن ءسوز بولسا كەرەك.

“The Qazaq Times”