ۋكراينا قازاقستانعا قاراتا شاعىم ءتۇسىردى

“قازىرگى كەزدە ەاەو-دا، اتاپ ايتقاندا قازاقستاندا قولدانىلىپ جۇرگەن ۋكراينانىڭ كەيبىر بولات قۇبىرلارىنىڭ يمپورتىنا قاتىستى دەپينگكە قارسى شارالار 1994 جىلعى تاريفتەر مەن ساۋدا تۋرالى باس كەلىسىمنىڭ VI بابىندا بەلگىلەنگەن تالاپتارعا سايكەس كەلمەيدى", - دەلىنگەن مينيسترلىك حابارلاماسىندا.

ەندى جىبەرىلگەن تالاپ بويىنشا قازاقستان 10 كۇن ۇىشىندە كونسۋلتاتسيا وتكىزۋ بويىنشا جاۋاپ جىبەرۋ كەرەك. قازاقستاننىڭ كەلىسىمىنەن سوڭ ەكى تاراپ كونسۋلتاتسيانى وتكىزەتىن كۇندى بەلگىلەيدى.

ەۋرازيالىق ەكونوميكالىق وداق اۋماعىنا ۋكراينانىڭ قۇبىر ونىمدەرىن اكەلۋگە قاتىستى دەمپينگكە قارسى شارالار 2011 جىلدىڭ قازان ايىنان باستاپ قولدانىسقا ەنگەن. 2016 جىلدىڭ ماۋسىم ايىندا دەمپينگكە قارسى شارالار بەس جىلعا ۇزارتىلدى. سونداي-اق، دەمپينگكە قارسى باج سالىعىنىڭ مولشەرلەمەسى ءونىم تۇرىنە بايلانىستى 18,9%-دان 37,8%-عا دەيىن بەلگىلەنگەن.

ايتا كەتەيىك، ۇزاق مەرزىمدى كەلىسسوزدەردەن كەيىن قازاقستان 2015 جىلدىڭ 27 ماۋسىمىندا دسۇ-عا رەسمي تۇردە قوسىلدى. ال ۋكراينا 2008 جىلدان بەرى ۇيىمنىڭ تولىق قۇقىقتى مۇشەسى.

“The Qazaq Times”