فوتو: russiansu.ru

قر ەڭبەك جانە الەۋمەتتىك قورعاۋ مينيسترلىگى شەتەل ازاماتتارىنىڭ ەڭبەك ەتۋىنە رۇقسات بەرۋدىڭ ءۇش ءتۇرىن ۇسىندى جانە بىرتىندەپ ميگرانتتاردى ۇلتتىق كادرلارعا الماستىرۋ جۇمىستارىن قولعا الماق. مينيستر تامارا دۇيسەنوۆا ۇكىمەت وتىرىسىندا 2017-2021 جىلدارعا ارنالعان قر ميگراتسيالىق ساياساتى جونىندەگى كونتسەپتسيانى تانىستىرۋ كەزىندە وسىلاي دەدى.

وسىلايشا ول شەتەلدىك مامانداردىڭ ەڭبەك ەتۋى ءۇشىن رۇقسات بەرۋدىڭ تومەندەگىدەي ءۇش ءتۇرىن ۇسىندى: 

  • ءبىرىنشىسى، بىلىكتىگى تومەن شەتەلدىك جۇمىسشىلاردىڭ ۋاقىتشا جۇمىس ىستەۋىنە ءبىر جىلعا رۇقسات بەرۋ. بۇل ولاردىڭ كەلۋىن ازايتادى. سونداي-اق جەكە تۇلعالاردىڭ قولىندا جۇمىس ىستەيتىن شەتەلدىك جۇمىسشىلار مەن ەڭبەك ميگرانتتارىنا قاتىستى بولادى;
  • رۇقسات بەرۋدىڭ ەكىنشى ءتۇرى بىلىكتى شەتەلدىك جۇمىسشىلاردىڭ ءۇش جىلعا دەيىن جۇمىس ىستەۋىنە مۇمكىندىك بەرەدى. ولار مەملەكەت ءۇشىن ماڭىزى بار جوبالارعا قاتىسادى. قازىرگى كەزدە بۇل رۇقسات ءتۇرى جىل سايىن ۇزارتۋ ارقىلى ءبىر جىلعا بەرىلىپ ءجۇر;
  • ال رۇقساتتىڭ ءۇشىنشى ءتۇرىن ۇزاق مەرزىمدى جوبالاردى ىسكە اسىرۋ ءۇشىن كاسىبي قىزمەتى بار بىلىكتى شەتەلدىك قىزمەتكەرلەرگە بەرۋ. بۇل 2017 جىلى ەنگىزىلگەن انىقتاما جۇيەسى. كونتسەپتسيا اياسىندا وسى انىقتامالاردىڭ جارامدى مەرزىمىن ءۇش ايدان ءۇش جىلعا دەيىن سوزۋ ۇسىنىلىپ وتىر. جۇمىسشىنىڭ بىلىكتىلىگىنە قاتىستى بەرىلگەن انىقتاما ءۇش جىلعا دەيىن جارامدى بولادى جانە سول انىقتاما ارقىلى ءۇش جىل ىشىندە قازاقستاندا جۇمىسقا ورنالاسا الادى.

تامارا دۇيسەنوۆا بۇل شارالار شەتەل ماماندارىن ۇلتتىق كادرلارمەن الماستىرۋ ءۇشىن جالپىۇلتتىق بىلىكتىلىكتى ارتتىرۋ باعدارلاماسىنىڭ ىسكە اسىرىلۋىمەن بىرگە جۇرەتىنىن اتاپ ءوتتى.

“The Qazaq Times”