سەرگەي سوبيانين قۇرلىس ورنىندا. فوتو: ريا نوۆيست.

ءسىم باسشىسى «قازاقستاندا ورىس تىلدىلەرگە قارسى كسەنوفوبيا بار» دەپ مالىمدەمە جاساعان رەسەيدىڭ ورتالىق قالا مەرى قۇرلىس كومپانيالارعا ميگرانتتاردان قۇتىلۋدى باسا تاپسىرىپ جاتىر. ماسكەۋدەگى قۇرلىس ىستەرىنەن ميگرانتتاردى ازايتۋ جوسپارىنىڭ بار ەكەنىن قالا مەرى سەرگەي سوبيانين بۇعان دەيىن دە ايتىپ كەلگەن ەدى.

ماسكەۋ قالا مەرىنىڭ ءسوزىن العاشقىلاردان بولىپ «كوممەرسانت» باسىلىمى جازدى. باسىلىم حابارىنشا، قۇرلىس ورنىندارىن ارالاپ جۇرگەن سويانين كومپانيا ديرەكتورىنا: «باسقاشا ايلىقپەن باسقا سيپاتتاعى ادامدار [كەرەك]، قازىر سىزدەردە كوپ بولىپ وتىرعان ميگرانتتاردى ازىراق [تارتۋ كەرەك]. جاقىنعى ايماقتاردان رەسەيلىكتەردى تارتىڭدار، ايلىقتارىن كوتەرۋگە، جۇمىس ىستەۋگە شارت تۇزىلگەن»، – دەگەن تاپسىرماسىن بەرگەن.

ماسكەۋدىڭ باۋمانسكايا كوشەسىندەگى حرۋششەۆكالاردىڭ ورنىنا جاڭا قۇرلىستار سالۋدى جۇزەگە اسىرىپ جاتقان قۇرلىس كومپانياسىنىڭ گەن-ديرەكتورى الەكسەي دوباشين قالا مەرىنە جۇمىسشىلارى اراسىنان ميگرانتتاردىڭ 15 پايىزىن قىسقارتقانىن، قۇرلىسشىلاردىڭ 120-150 مىڭ رۋبل ايلىق الىپ جاتقانىن مالىمدەدى. ونىڭ بۇل سوزىنە سويانين: «بۇل ماسكەۋلىكتەردىڭ ايلىعى، ميگرانتتاردىكى ەمەس»، – دەپ قاداي ايتقان.

انىعىندا كوپ جىلداردان بەرى ماسكەۋ قالاسىنداعى قۇرلىس جۇمىستارىنىڭ باسىم كوبىن ميگرانتتار جۇزەگە اسىرىپ كەلگەن. پاندەمياعا بايلانىستى ەلدە قۇرلىس سالاسىنداعى سىرتقى ەڭبەك كۇشتەردىڭ سانى كەسكىن قىسقارىپ كەتكەن. ماسكەۋ قالالىق ۇكىمەتى ميگرانتتاردىڭ ورنىنا جەرگىلىكتى جۇمىسشىلاردى تارتۋ ءۇشىن ۇكىمەت تارابىنان سۋبسيديا قاراستىرىپ جاتقانىن دا مالىمدەگەن بولاتىن.

بۇعان دەيىن ماسكەۋدە قۇرلىس ەڭ قارقىندى جۇرەتىن شىلدە جانە تامىز ايلارىندا 18-20 مىڭ شاماسىندا قۇرلىس جۇمىسشىلارىنىڭ جەتىسپەي جاتقانى ايتىلعان. قالالىق قۇرلىس دەپارتامەنتى جاريالاعان بۇل دەرەككە ساي قۇرلىس جۇمىستارىنا جەرگىلىكتى جۇمىسشىلاردى تارتۋ ءۇشىن قارجى ءبولىنىپ جاتقانى دا ءمالىم بولعان.

رەسەي پوست-كەڭەستىك ەلدەردىڭ، اسىرەسە ورتا ازيا ەلدەرىندەگى (قىرعىزستان، وزبەكستان، تاجىكستان) جۇمىس كۇشىنە بەلگىلى دەڭگەيدە مۇقتاج. ەڭبەك نارىعى مەن ساۋدا نارىعى بويىنشا ورتا ازيا رەسەي ءۇشىن اسا ماڭىزدى ايماق سانالادى.

The Qazaq Times