فوتو: Yvision.kz

"روسسيسكايا گازەتا" باسىلىمىندا تاباك ونىمدەرىنە قارسى ەۋرازيالىق كواليتسيانىڭ رەسەي پرەمەر-ءمينيسترى دميتري مەدۆەدەۆكە قاراتا جازعان حاتى جاريالاندى. كوليتسيانىڭ مالىمەتىنشە، الداعى بەس جىلدا ەۋرازيالىق ەكونوميكالىق وداق ەلدەرىندەگى (ەاەو) تاباك اكتسيزدەرىنىڭ قۇنى قاتتى تومەندەپ كەتۋى مۇمكىن. ال بۇل تەمەكى ەپيدەمياسىنا، اۋرۋ مەن ءولىم-ءجىتىمنىڭ وسۋىنە اكەپ سوعادى. سوندىقتان حات اۆتورلارى مۇنداي جاعداي بولماس ءۇشىن سالىق كولەمىن كوتەرۋ كەرەك دەپ ەسەپتەيدى.

ەرتەڭ، ياعني 15 قىركۇيەك كۇنى ەۋرازيالىق ەكونوميكالىق كوميسسيا كەڭەسى قازاقستان، ارمەنيا، قىرعىزستان، بەلارۋس جانە رەسەيدەگى تاباك ونىمدەرىنىڭ اكتسيز مولشەرلەمەسىن قاراستىرادى. ال ەۋرازيالىق كواليتسيانىڭ مالىمەتىنشە،  ەاەو ەلدەرى اراسىنداعى تەمەكى اكتسيزدەرىن تاعايىندايتىن سالىق ساياساتىن ەنگىزۋ قاعيدالارى تۋرالى كەلىسىم ءماتىنى نە مەملەكەت ىشىندە ماقۇلدانباعان، نە ۇيىمعا مۇشە ەلدەردىڭ دەنساۋلىق ساقتاۋ مينيسترلىكتەرى تاراپىنان قارالماعان. بۇل وسىمەن ءۇشىنشى رەت  بولىپ وتىر ەكەن.

"شارت جوباسى تەمەكى ونىمدەرىن وندىرۋشىلەرىنىڭ مۇددەلەرىنە ساي كەلەتىنى الاڭداتادى. ءتىپتى كەلىسىم دۇنيەجۇزىلىك دەنساۋلىق ساقتاۋ ۇيىمىنىڭ تەمەكىگە قارسى كۇرەس جونىندەگى نەگىزدەمە كونۆەنتسياسىنا دا قايشى كەلەدى", - دەلىنگەن حابارلامادا.

حات اۆتورلارىنىڭ سوزىنشە، 2022 جىلعا قاراي ەاەو ەلدەرىندە 1000 قوراپ تەمەكىنىڭ اكتسيز قۇنى 35 ەۋرو بولادى ەكەن، ال بۇل ەۋروپالىق وداق ەلدەرىندە 90 ەۋرونى قۇرايدى. سوندىقتان كواليتسيا وكىلدەرى رەسەي پرەمەرىنەن "تەمەكى اكتسيزدەرىنىڭ مولشەرلەمەسىن ەۋروپالىق ستاندارتقا ساي ەتىپ جاساۋدى" سۇراپ وتىر.

“The Qazaq Times”