قازاقستاندا تەمەكىگە سۇرانىس ازايعان

وسى جىلدىڭ مامىر ايىنداعى ناتيجە بويىنشا قازاقستاندا تەمەكىنىڭ ءبىر قورابى 10,2%-عا نەمەسە ورتا ەسەپپەن 340 تەڭگەگە دەيىن كوتەرىلگەن.

ال وڭىرلەردەگى باعاعا كەلەر بولساق تەمەكىنىڭ ءبىر قورابى ءۇشىن قىمبات تولەمدى جەزقازعان (363 تەڭگە، ءبىر جىلدا 9,3%-عا قىمباتتاعان), استانا (357 تەڭگە، ءبىر جىلدا 9,3%-عا قىمباتتاعان), اقتاۋ (355 تەڭگە، ءبىر جىلدا 7,6%-عا قىمباتتاعان) تۇرعىندارى جاساعان.

Energyprom اگەنتتىگىنىڭ مالىمەتىنشە، تاباك ونىمدەرى اكتسيزدەرىنىڭ كوتەرىلۋىنە بايلانىستى باعانىڭ كوتەرىلۋى زاڭدى. 2016 جىلمەن سالىستىرعاندا وسى جىلى اكتسيز قۇنى 24%-عا نەمەسە 1000 داناسانىڭ باعاسى 5 مىڭ تەڭگەدەن 6200 تەڭگەگە دەيىن كوتەرلىگەن. ال 2018 جىلى مولشەرلەمەنى 7, 5 مىڭ تەڭگەگە، 2019 جىلى 8,7 مىڭ تەڭگەگە كوتەرۋ جوسپارلانعان.

بۇدان بولەك تەمەكى جانە باسقا دا تاباك ونىمدەرىن شىعارۋ قازاقستاندا قىسقارىپ جاتىر. وسى جىلدىڭ قاڭتار-مامىر ايىندا 5,1 ملرد دانا تەمەكى شىعارىلعان جانە بۇل وتكەن جىلدىڭ سايكەس كەزەڭىمەن سالىستىرعاندا 22,4%-عا تومەن. ال 2016 جىلعى كورسەتكىش 2015 جىلعا قاراعاندا 5,9%-عا تومەن بولعان.

وسى جىلدىڭ ءتورت ايىندا تەك ءوندىرىس قانا ەمەس، تەمەكىگە سۇرانىس تا ازايعان. ىشكى نارىقتاعى ساتىلىم ءبىر جىل ىشىندە 14%-عا تومەندەگەن. يمپورت كولەمى دە وتكەن جىلعا قاراعاندا 14,9%-عا ازايعان.