اقش-رەسەي قايشىلىعى: كرەملدىڭ دوستاستىق تىلەگىن اق ءۇي نەگە قابىلدامادى؟

كرەمل بيىلعى جىلدىڭ باسىندا ترامپ ۇكىمەتىنە ەكى ەل اراسىنداعى قارىم-قاتىناستى قايتا قالپىنا كەلتىرۋدىڭ جول كارتاسىن ۇسىنعانىن مالىمدەدى. الايدا، اقش ۇكىمەتى بۇعان جاۋاپ بەرمەگەن. بۇل تۋرالى «The Wall Street Journal» باسىلىمىندا جازىلدى.

كرەملدىڭ باس مالىمدەمەشىسى دميتري پەسكوۆ اقپاراتىنشا، رەسەي قۇراما شتاتتارمەن ءارتۇرلى فورمالار ارقىلى ديپلوماتيالىق جانە اسكەري ارنالارىن قايتا قالپىنا كەلتىرۋدىڭ جوباسىن ۇسىنعان. ول سوزىندە: «رەسەي ءاردايىم پىكىر الماسۋدى، ديالوگتى قالپىنا كەلتىرۋدى قولدايدى. سونداي-اق، قارىم-قاتىناستى رەتكە سالۋ جوباسىنىڭ شەشىم تابۋى ءۇشىن بىرگە جۇمىس ىستەۋگە تىرىسادى. بىراق، وكىنىشكە وراي، اقش ۇكىمەتى بۇل ۇسىنىسقا جاۋاپ بەرمەدى»، – دەدى.

BuzzFeed سايتى سەيسەنبىدە جاريالاعان حابارىنا سەنسەك، رەسەي ترامپ ۇكىمەتىنە قۇجات جولداعان، ونىڭ مازمۇنىندا اسكەري جانە ينتەللەكتۋالدى بايلانىستاردى قالپىنا كەلتىرۋ تۋرالى ۇسىنىستار ەنگىزىلگەن. ناۋرىزدا شىعارىلعان قۇجاتتار بىرقاتار باستامالاردى جۇزەگە اسىرۋ ءۇشىن ناقتى كەزدەسۋلەر مەن مەرزىمدەردى قامتىدى. بۇل باستامالار ەكى جاقتى ساۋدانى دامىتۋعا دا باعىتتالعان. سونىمەن قاتار، كيبەرقاۋىپسىزدىك جانە تەرروريزمگە قارسى بىرلەسكەن جۇمىس توپتارىن قۇرۋدى دا قامتيدى.

ال، اق ءۇي تارابى، ۇلتتىق قاۋىپسىزدىك كەڭەسى رەسەيلىك ۇسىنىس جولداماسىنىڭ قابىلدانباعانىن راستادى. اق ءۇي شەنەۋنىكتەرىنىڭ ءبىرى بۇل تۋرالى: «جاڭا ۇكىمەت قىزمەتىن باستاۋدان ىلگەرى اقش پەن رەسەي قارىم-قاتىناسىن قايتا رەتتەۋگە، دوستىق قارىم قاتىناستى جاقسارتۋعا ۇمىتكەر بولدى. پرەزيدەنتتىڭ ءوزى سايلاۋدان بۇرىن رەسەيمەن بولعان بايلانىستى جاقسارتاتىنىن ايتقان بولاتىن. وكىنىشكە وراي بۇل ۇمىتتەر جۇزەگە اسپادى. ءىس ءبىز كۇتكەننەن باسقا باعىتقا دامىپ كەتتى»، – دەگەن پىكىرىن ءبىلدىردى.

“The Qazaq Times”