رەسەي ۇكىمەتى ەلدەگى كۇن سايىن ءوسىپ بارا جاتقان جانارماي باعاسىنا توسقاۋىل قويۋ ءۇشىن بيۋدجەتتەن قوسىمشا قارجى بولمەك. ەلدە بەنزين مەن ديزەلدىڭ قۇنى جىل باسىنان بەرى تۇراقتى تۇردە جوعارىلاعان. بۇنىڭ سوڭى جانارماي داعدارىسىنا الىپ كەلۋى مۇمكنى دەپ قاۋىپتەنگەن كرەمل شۇعىل شارا كورۋگە كىرىستى.

رەسەيدە بىلتىر جازدا دا وسىنداي جاعداي بولعان. ونى سول كەزدە ەنەرگەتيكا مينيسترلىگى كارانتيننەن كەيىنگى كولىك قاتىناسىنىڭ كوبەيۋىنەن بولدى دەپ تۇسىندىرگەن، جىل سوڭىندا قايتا قايتالانعاندا تاپشىلىقتان بولدى دەپ كورسەتكەن. بىراق، بيىل جىل باسىندا جاعداي كۇرت وزگەرىپ،  مۇناي وندىرۋشىلەر بيۋدجەتكە قاراجات سالدى. رەسەيلىك كەيبىر باسىلىمدار پاندەميا سەكىلدى كوپتەگەن سەبەپتەر رەسەيدىڭ مۇناي ءوندىرىسى سالاسىندا جۇمىس ىستەپ كەلگەن «ءداستۇرلى مەحانيزمىنە» سوققى ۇرعانىن جازىپ جاتىر.

بۇل رەسەي ۇكىمەتىن وسى سالادا جاڭا فورمۋلا جاساقتاۋعا ءماجبۇر ەتتى. ەنەرگەتيكا مينيسترلىگى جاڭا فورمۋلا قازىرگى جاھاندىق ەكونوميكالىق جاعداي مەن مۇناي نارىعىنداعى وزگەرىستەرگە بارىنشا بەيىمدەلگىش دەپ تۇسىندىرگەن بولدى. بۇل فورمۋلا مامىر ايىنان باستاپ جۇمىسىن ىستەي باستايدى.

رەسەيدەگى جانارماي باعاسىنىڭ قىمباتتاۋى ونىڭ مۇناي ونىمدەرىنە تاۋەلدى ەلدەرگە دە اۋىر ءتيىپ جاتىر. بۇلاردىڭ اراسىندا ورتالىق ازيادان قىرعىزستان، تاجىكستان سەكىلدى ەلدەر دە بار. بايلانىستىرا ايتقاندا، رەسەيدەگى جانارماي باعاسىنىڭ قىمباتتاۋى اتالعان ەلدەردەگى زات باعاسىنىڭ قىمباتتاۋىنا الىپ كەلۋدە. بۇل رەسەيگە بولاشاقتا ديپلوماتيالىق قيىنشىلىقتار دا الىپ كەلۋى مۇمكىن.

“The Qazaq Times”