الماتىدا بەنزين قىمباتتادى

الماتى قالاسىنداعى ءىرى جانارماي بەكەتتەرىندە بەنزين مەن ديزەل وتىنىنىڭ باعاسى قىمباتتادى، دەپ حابارلايدى Sputnik قازاقستان.

مىسالى «قازمۇنايگاز» جانار-جاعارماي بەكەتىندە اي-92 ماركالى بەنزيننىڭ ءليترى تامىز ايىنان بەرى 3 تەڭگەگە قىمباتتاپ، 144 تەڭگەگە جەتكەن. اي-95 ماركالى جانارماي قۇنى دا 3 تەڭگەگە قىمباتتاپ 158 تەڭگە بولعان. ال ديزەل وتىنىنىڭ باعاسى تامىز ايىنىڭ باسىنان بەرى 4 تەڭگەگە قىمباتتاپ، 144 تەڭگەنى قۇراعان.

Royal Petrol جانارماي بەكەتتەرىندەگى باعا مىناداي: اي-92 ماركاسىنىڭ ءليترى - 145 تەڭگە  (تامىز ايىندا 143 تەڭگە بولعان), ديزەل وتىنىنىڭ ءليترى - 145 تەڭگە (1 تەڭگەگە قىمباتتاعان), اي-95 ماركاسى — 159 تەڭگە.

Sinوoil-دا اي-92 2 تەڭگەگە قىمباتتاپ، 145 تەڭگەگە جەتتى. ال ديزەل وتىنى مەن اي-95 ماركالى بەنزيننىڭ باعاسى 1 تەڭگەگە قىمباتتاپ، سايكەسىنشە، 144 جانە 159 تەڭگەنى قۇرادى.

Helios جانارماي قۇيۋ بەكەتتەرىندە اي-92 - 145 تەڭگەدەن، ديزەل وتىنى - 146 تەڭگەدەن، اي-95 — 159 تەڭگەدەن ساتىلىپ جاتىر.

ەڭ جوعارعى باعا «گازپرومنەفت — قازاقستان» جانارماي قۇيۋ بەكەتتەرىندە بەلگىلەنگەن. مۇندا اي-92 باعاسى 147 تەڭگە (2 تەڭگەگە قىمباتتاعان). ديزەل وتىنىنىڭ باعاسى 147 تەڭگە، اي-95 ماركالى بەنزيننىڭ ءليترى — 168 تەڭگە.

ايتا كەتەيىك، وسى جىلدىڭ ءبىرىنشى جارتى جىلدىعىندا قازاقستانداعى مۇنايدى قايتا وڭدەۋشى زاۋىتتار 7,4 ملن توننا مۇناي وڭدەگەن. بۇل 2016 جىلدىڭ سايكەس كەزەڭىمەن سالىستىرعاندا 5,4%-عا ارتىق. پاۆلودار مۇناي-حيميا زاۋىتى مۇنايدى 13,1%-عا ارتىق وڭدەگەن (2648,7 توننا). ال شىمكەنت ءموز-ءى كەرىسىنشە، وڭدەۋ جۇمىسىن 19,8%-عا ازايتقان (1 895,5 مىڭ توننا). اتىراۋ مۇناي وڭدەۋ زاۋىتىنىكى 19,6%-عا ارتىق (2 508,3 مىڭ توننا).

قازاقستان مۇنايعا باي ەلدەردىڭ قاتارىنا بولعانمەن، ىشكى نارىقتاعى شيكىزات ونىمدەرىنىڭ سۇرانىسىن ءالى قاناعاتتاندىرا الماي كەلەدى. ءالى كۇنگە رەسەيلىك بەنزين مەن جاعارمايعا تاۋەلدى بولىپ وتىرمىز. وسى ۋاقىتقا دەيىن سىرتقى نارىققا تاۋەلدى بولماۋدىڭ قاندايدا ءبىر ستراتەگيالىق جوسپارى جاسالعان كۇننىڭ وزىندە، ونى جۇزەگە اسىرا الماي كەلەمىز.

“The Qazaq Times”