قر دەنساۋىق ساقتاۋ ءمينيسترى ەلجان ءبىرتانوۆ. فوتو: Sputnik كازاحستان

قر دەنساۋلىق ساقتاۋ ءمينيسترى ەلجان ءبىرتانوۆ مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ مەرزىمى ءبىر-ەكى جىلعا شەگەرىلۋى مۇمكىن ەكەنىن جوققا شىعارعان جوق. الايدا ول مەدساقتاندىرۋ قورىنا جۇمىس بەرۋشىلەردەن بۇرىنعىداي قاراجاتتى جيناي بەرۋدى ۇسىنىپ وتىر. 

وسىلايشا ءبىرتانوۆ ءبىر-ەكى جىلعا كەشىكتىرىلىپ ەنگىزىلۋى مۇمكىن جۇيەگە جينالعان قاراجاتتىڭ قايدا تۇسەتىنىن ءتۇسىندىردى.

ونىڭ سوزىنشە، جۇيەنى ەنگىزۋ مەرزىمى وزگەرۋىنە قاراماستان ۆەدومستۆو جۇمىس بەرۋشىلەردەن جارنانى جيناي بەرۋ تۋرالى ۇسىنىستى قاراستىرادى.

"جۇيەنى ەنگىزۋ مەرزىمىن اۋىستىرۋ ۇسىنىلىپ وتىر. ياعني ءبىز قوردىڭ جۇمىسىن، جۇمىس بەرۋشىلەردەن جارنا جيناۋدى جالعاستىرا بەرەمىز. ءبىزدىڭ ۇسىنىسىمىز - ءتۇسىپ جاتقان جارنالاردى جيناي بەرۋدى جالعاستىرۋ. بىراق مەديتسينالىق قىزمەت ءۇشىن تولەمدەردىڭ مەرزىمى اۋىسۋى مۇمكىن. ءبىز قازىر مۇنى قايتا قاراستىرىپ جاتىرمىز", - دەدى مينيستر.

ال وسى ۋاقىتقا دەيىن جينالعان قارجى ۇلتتىق بانك شوتىندا ساقتالاتىن بولادى. سونداي-اق، الداعى ەكى جىلدا مەدساقتاندىرۋ قورىنا 160 ملرد تەڭگە تۇسەدى دەپ كۇتىلۋدە.

ايتا كەتەيىك، 4 قىركۇيەك كۇنى قازاقستان پرەزيدەنتى نۇرسۇلتان نازارباەۆ مىندەتتى الەۋمەتتىك مەديتسينالىق ساقتاندىرۋ جۇيەسىندەگى كەمشىلىكتەرگە نازار اۋدارىپ، اتالعان جۇيەنى ەنگىزۋگە اسىقپاۋ كەرەگى تۋرالى ايتقان.

شىن مانىندە وسى جىلدىڭ 1 شىلدەسىنەن باستاپ ساقتاندىرۋ قورىنا اقشا اۋدارۋ باستالىپ كەتكەن. كەلەسى جىلدىڭ 1 قاڭتارىنان باستاپ وسى ساقتاندىرۋ قورىنداعى قاراجات ارقىلى مەديتسينالىق قىزمەت كورسەتۋ باستالۋ كەرەك ەدى. الايدا ەندى بۇل قىزمەتتى الۋ دا مۇمكىن بولمايىن دەپ تۇر.

ايتا كەتەيىك، اتالعان جۇيە باستالماي تۇرىپ-اق ەكونوميستەردىڭ سىنىنا ۇشىراعان ەدى. ال ەگەر ونى تاعى ەكى جىلعا كەشىكتىرىپ ەنگىزۋ جۇزەگە اساتىن بولسا، بۇل حالىق اراسىندا تاعى تۇسىنسپەۋشىلىك تۋعىزاتىنى ءسوزسىز.

“The Qazaq Times”