ءدىني كوزقاراس ءۇشىن ۆاكتسيناتسيادان باس تارتاتىندار كوبەيگەن

سوڭعى جىلدارى قازاقستاندادا، ونىڭ ىشىندە باتىس ايماقتاردا ءدىني كوزقاراس بويىنشا ۆاكتسيناتسيادان باس تارتۋ ماسەلەسى وزەكتى بولىپ وتىر. اتالعان ايماقتاردا بۇل كورسەتكىش 80 % قۇرايدى، دەپ حابارلايدى قر ءدىن ىستەرى جانە ازاماتتىق قوعام مينيسترلىگىنىڭ ءباسپاسوز قىزمەتى.

ءدىني كوزقاراسى بويىنشا ەكپەدەن باس تارتۋ اتىراۋ وبلىسىندا 88,9%، اقتوبە وبلىسىندا – 87,9%، باتىس قازاقستاندا وبلىسىندا 89,3% قۇرايدى. ءدىني كوزقاراسى بويىنشا باس تارتۋدىڭ جوعارى كورسەتكىشى وڭتۇستىك قازاقستاندا دا بايقالادى (71,3%).

2016 جىلى قازاقستان رەسپۋبليكاسىندا  پروفيلاكتيكالىق ەكپەدەن باس تارتۋ تىركەلدى. 2015 جىلمەن سالىستىرعاندا باس تارتقاندار سانى 13,4% (8383) وسكەنى بايقالادى.

باس تارتۋدىڭ نەگىزگى سەبەپتەرى 45% (4360) جەكە ماسەلە بويىنشا،  42,9% (4151) ءدىني كوزقاراسى بويىنشا باس تارتسا، ال، 6,2% (600) بۇقارالىق اقپارات قۇرالدارىندا جاريالانعان جاعىمسىز اقپارتتىڭ سالدارىنان ەكپەدەن باس تارتقان. تۇرعىنداردىڭ 6,1% (589) ۆاكتسيناعا سەنىمسىزدىك بىلدىرەدى.

"قازاقستان رەسپۋبليكاسى دەنساۋلىق ساقتاۋ مينيسترلىگىنىڭ اقپاراتى بويىنشا ۆاكتسينادان باس تارتۋ سانىنىڭ ءوسۋى ۆاكتسينالىق باسقارۋعا بولاتىن ينفەكتسياعا بەيىم كونتيگەنتتىڭ بولۋىنا اكەپ سوعادى. بۇل ولار اۋىرعان جاعدايدا مۇگەدەكتىك نەمەسە ادام ولىمىنە دەيىن اۋىر اسقىنۋلارعا اكەلەدى", دەلىنگەن ءباسپاسوز حابارلاماسىندا.

قازاقستان رەسپۋبليكاسى كونستيتۋتسياسىنىڭ 31 بابىنا سايكەس مەملەكەت ادامنىڭ دەنساۋلىعى مەن ءومىرى ءۇشىن جاعداي جاساۋ، قورشاعان ورتانى قورعاۋدى ماقسات ەتىپ قويادى.

قازاقستان رەسپۋبليكاسى كونستيتۋتسياسىنىڭ 39 بابىنا سايكەس ادامنىڭ جانە ازاماتتىڭ قۇقىقتارى مەن بوستاندىقتارى تۇرعىنداردىڭ دەنساۋلىعىن قورعاۋ ماقساتىندا قاجەتتى دەڭگەيدە زاڭمەن شەكتەلۋى مۇمكىن.

مينيسترلىكتىڭ مالىمەتىنشە، قازىرگى ۋاقىتتا زاڭ جوباسى اياسىندا قاراستىرىلىپ وتىرعان مىندەتتى ۆاكتسيناتسيانى ەنگىزۋ ماسەلەسى تالقىلانۋدا.

“The Qazaq Times”