فوتو عالاتور بەتتەرىنەن الىندى.

APF اقپاراتتىق اگەنتتىگىنىڭ حابارلاۋىنشا، جارىلىس كابۋلدىڭ ورتالىعىندا، اقش-تىڭ اۋعانستانداعى ەلشىلىگىنىڭ جانىندا بولىپ، بىرنەشە ادامنىڭ جارالانۋىنا جانە 4 ازاماتتىڭ قازاسىنا سەبەپكەر بولعان. 

قاربالاس كوشە ورتاسىندا ءوزىن-ءوزى جارىپ جىبەرگەن دجيحادشىلاردىڭ مۇنداي ارەكەتى كابۋلدا وسىمەن بىرنەشە رەت قاتارىنان قايتالانىپ وتىرعان قۇبىلىس. وسىدان ءۇش اي بۇرىن وسى ماڭدا ۇلكەن جۇك كولىگى جارىلىپ، ناتيجەسىندە 150 ادام ءولىم قۇشقان بولاتىن.

اۋعانستاننىڭ ىشكى ىستەر مينيسترلىگىنىڭ وكىلى ناتان داش: "تەرراكت ماسۋد الاڭىنداعى بانك بولىمشەسىنىڭ جانىندا بولعان. بۇل شەنەۋنىكتەردىڭ قۇربان ايت مەرەكەسى قارساڭىندا جالاقى الاتىن كەزى بولاتىن", - دەدى.

سوڭعى كەزدەرى تاليباندىقتاردىڭ قولىمەن ۇيىمداستىرىلعان تەرراكت وقيعالارى جيىلەدى. جۋىردا اقش پرەزيدەنتى دونالد ترامپ اۋعانستانعا قاتىستى جاڭا ساياساتىن جاريالاپ، وڭىردەگى امەريكالىق اسكەريلەردىڭ ۇلەسىن ارتتىرۋ تۋرالى شەشىم قابىلداعان بولاتىن.

ودان بۇرىن ترامپقا اشىق حات جولداپ، اۋعانستان جەرىنەن كەتۋگە كەڭەس بەرگەن تاليباندىقتار ۇندەۋلەرى ەسكەرىلمەگەننەن كەيىن، الداعى ۋاقىتتا تاياۋ شىعىستى شەت ەلدىڭ اسكەري كۇشتەرى ءۇشىن "مولاعا" اينالدىرۋعا ۋادە بەرگەن ەدى.

“The Qazaq Times”