فوتو عالامتور بەتتەرىنەن الىندى.

بۇگىن تاڭەرتەڭ ميلليونداعان جاپوندىقتار وزدەرىنە قارسى بالليستيكالىق زىمىران اتىلعانى تۋرالى سۋىت حابارلامادان وياندى. زىمىراننىڭ تراەكتورياسىندا ورنالاسقان ەلدىڭ سولتۇستىك بولىگىندە دابىل ويناپ، جەرگىلىكتى تۇرعىندارعا جەرتولەلەر مەن جابىق ورىندارعا جاسىرىنۋعا بۇيرىق بەرىلدى. بۇل تۋرالى جاپوندىقتارمەن تىلدەسكەن APF اقپاراتتىق اگەنتتىگىنىڭ جۋرناليستەرى جازدى.

سولتۇستىك كورەيا اۋماعىنان تاڭعى 05:57 شاماسىندا ۇشىرىلعان زىمىران جاپونيا تەرريتورياسىنىڭ اسپانىندا 2 مينۋتتاي بولىپ، تىنىق مۇحيتىنا قۇلاعان. جەرگىلىكتى تۇرعىندارعا ءبىر مەزەتتە زىمىران قاۋپىن ەسكەرتكەن حابارلاما كەلىپ، الاڭسىز ۇيقىداعى حالىقتى ابىگەرگە سالدى.

تاڭعى پويىزعا جولعا شىققان جاپوندىقتار ەسكەرتۋ بەلگىلەرى مەن كولىك قوزعالىسى توقتاتىلعانى جونىندە حابارلاماعا كەزىكتى. جولاۋشى تاسىمالىمەن اينالىساتىن پويىزداردىڭ ءبىرى ءوز قىزمەتىنىڭ توقتاتىلۋى "بالليستيكالىق زىمىراننىڭ ۇشىرىلۋىنان" دەپ انىق ءارى ءدال  كورسەتكەن. بيلىك وكىلدەرى حالىققا: "تۇسىنىكسىز قالدىقتار مەن زاتتارعا تاپ بولساڭىزدار، قولمەن ۇستاپ نە جاقىن بارماڭىزدار! دەرەۋ پوليتسيا قىزمەتكەرلەرى مەن ءورت سوندىرۋشىلەرگە قوڭىراۋ شالىڭىزدار!", - دەپ ەسكەرتتى.

اقش-تىڭ جاقىن وداقتاسى جاپونياعا قارسى اتىلعان زىمىران سولتۇستىك كورەيانىڭ جاپپاي قارۋلانۋ ساياساتىنا قاتىستى ماقساتتارىنان باس تارتپايتىنىن تاعى ءبىر دالەلدەپ، ارال تۇرعىندارى ءۇشىن جاڭا قاۋىپ ءتوندىردى.

جاپونيادا بارلىق توتەنشە جاعدايلارعا ارنالعان وقۋ-جاتتىعۋلارى ءجيى ۇيىمداستىرىلىپ، جەرگىلىكتى حالىق ۇنەمى دايىن جۇرگەنىمەن، بۇگىنگى جاعداي جاپوندىقتاردىڭ كوڭىلىنە كۇدىك پەن قورقىنىش ۇيالاتتى.

68 جاستاعى بۇرىنعى مەملەكەتتىك قىزمەتكەر يوشياكي ناكانە: "بۇل جاعداي اقش پەن سولتۇستىك كورەيانىڭ ونسىز دا قيىن قارىم-قاتىناسىن ودان ءارى شيەلەنىستىرىپ جىبەرەدى مە دەپ قاۋىپتەنەم", - دەدى.

سولتۇستىك كورەيا وسىدان بۇرىن 2009 جىلى جاپونياعا قارسى زىمىران ۇشىرعان كەزدە، ونى جەر سەرىگىنە بايلانىستى قاتەلىكتەن، وقىستان بولعان جاعداي دەپ تۇسىندىرگەن. الايدا، اقش پەن وڭتۇستىك كورەيا جانە جاپونيا بيلىگى مۇنى يادرولىق قارۋدىڭ استىرتىن سىناماسى دەپ جورىعان بولاتىن.

“The Qazaq Times”