فوتو: Reuters

فيلليپيندىك ءجاسوسپىرىم كيان لويد دە سانتوس ەل  پرەزيدەنتى رودريگو دۋتەرتەنىڭ باستاماسىمەن 14 ايدان بەرى جۇرگىزىلىپ كەلە جاتقان "ەسىرتكىگە قارسى سوعىستىڭ" قۇربانى بولدى. كەزەكتى رەيد كەزىندە پوليتسيا قىزمەتكەرلەرى جازىقسىز جىگىتتى باسىنان اتىپ، قاراۋسىز قالعان وزەن جاعاسىنا قالدىرىپ كەتكەن. بۇل تۋرالى Reuters اقپاراتتىق اگەنتتىگى جازدى. 

وتكەن اپتادا بولعان وقيعا بۇكىل فيلليپيندە،  رودريگو دۋتەرتەنىڭ ەسىرتكىگە قاتىسى بار دەگەن كۇدىكتىلەردى سوتتىڭ شەشىمىنسىز، قولعا تۇسكەن جەرىندە قارسىلىق بىلدىرگەنى ءۇشىن ولتىرۋگە رۇقسات بەرەتىن ساياساتىنا نارازىلىق تۋدىردى. 14 ايدىڭ ىشىندە مىڭداعان ادام سوتسىز ولتىرىلگەن. مەملەكەت باسشىسى مۇنداي قاتاڭ جازا ءفيلليپيندى ناشاقورلىق پەن ەسىرتكى ساۋداسىنان ارىلتادى دەپ سەنگەنىمەن، بۇل ساياسات الەمدىك قاۋىمداستىق تاراپىنان ۇلكەن سىنعا ۇشىرادى.

پوليتسيا قىزمەتكەرلەرىنىڭ ايتۋىنشا، كيان لويد دە سانتوس وفيتسەرلەردى كورگەن بويدا، ولاردىڭ ۇستىنەن وق جاۋدىرعان. وزدەرىن قورعاۋ ماقساتىندا قارسى اتىلعان وقتىڭ ءبىرى جاس جىگىتتىڭ باسىنا ءتيىپ، ول وقيعا ورنىندا مەرت بولعان. قۇقىق قورعاۋ قىزمەتكەرلەرى جاس بالانىڭ ناشاقور بولعانىنا سەنىمدى.

ال كەشكىسىن بولعان وقيعاعا سىرتتاي كۋا بولعان ازاماتتار وفيتسەرلەر دۇكەننىڭ جانىندا تۇرعان جەتكىنشەككە وزدەرى بارىپ، ونى سوققىعا جىققانىن ايتادى. ونان سوڭ، دە سانتوستى سۇيرەلەپ، قاراڭعى قوقىس ورنىنا الىپ كەتكەن. مۇنى كورگەن مەكتەپ وقۋشىسى ولاردىڭ سوڭىنان ەرۋگە قورىققانىن ايتىپ، Reuters  اگەنتتىگى جۋرناليستەرىنەن اتىن جاسىرىپ قالۋدى سۇراعان. جەرگىلىكتى تۇرعىندار "ەسىرتكىگە قارسى سوعىس" جاپپاي رەپرەسسياعا اينالىپ بارا جاتقانىنان قاۋىپتەنەدى. ولار دە سانتوستىڭ قارۋ نە ناشا ساتىپ الۋعا مۇمكىندىگى بولماعانىن، ونىڭ وتە كەدەي تۇرعانىن ايتادى. ءجاسوسپىرىمدى تانيتىنداردىڭ پىكىرىنشە، ول وسكەندە پوليتسيا قىزمەتكەرى بولۋدى ارماندايتىن، ازىلدەۋدى ۇناتاتىن، جاقسى بالا بولعان.

قازىر حالىق بەلسەندىلەرى مەن پروكۋراتۋرا، جەرگىلىكتى حالىق مەملەكەتتەن جاس بالانى ەش سەبەپسىز جەر جاستاندىرعان پوليتسيا قىزمەتكەرلەرىن جازالاۋدى سۇراپ، سوتقا شاعىمدانىپ وتىر. سوت پروتسەسىنىڭ قاي تاراپتىڭ پايداسىنا شەشىلەتىنى ءالى بەلگىسىز.

“The Qazaq Times”