ينگلاك پەن باراك وباما. فوتو: johnib.wordpress.com.

تايلاند جوعارعى سوتى بۇرىنعى پرەمەر-مينيستر ينگلاك شيناۆاترانى (Yingluck Shinawatra) قاماۋعا الۋ تۋرالى بۇيرىق شىعاردى. ول وسىعان دەيىن سوت شاقىرۋىنا كەلمەگەن. تۇتقىنداۋ بۇيرىعىنىڭ شىعۋى ينگلاكتىڭ كۇرىشتى سۋبسيديالاۋ باعدارلاماسىن جۇزەگە اسىرۋى تايلاند ءۇشىن اۋىر شىعىن الىپ كەلۋىنە بايلانىستى بولىپ وتىر. بۇل تۋرالى The Wall Street Journal باسىلىمى حابارلادى.

ينگلاكتىڭ ادۆوكاتىنىڭ ايتۋىنشا، تۇتقىنداۋ بۇيرىعى پوليتسيا تاراپىنا ونى قاماۋعا الۋ  ىقتيمالدىعىن بەرەدى، بىراق بۇل ءۇشىن شاعىمدانۋ مۇمكىندىگى بار. ينگلاك بولسا 2014 جىلى اسكەري توڭكەرىستەن كەيىن تاقتان قۇلاتىلعان بولاتىن. ال ول كۇرىشتى سۋبسيديالاۋ باعدارلاماسىندا قۇقىق بۇزۋشىلىق ورىن العانى ءۇشىن 10 جىلعا دەيىن باس بوستاندىعىنان ايىرىلۋى مۇمكىن.

بەيسەنبى كۇنى ول ءوزىنىڭ Facebook پاراقشاسىنا ءوزىنىڭ جاقتاستارىنىڭ قاقتىعىسۋىنا جول بەرمەۋ ءۇشىن سوتقا بارمايتىنىن ايتقان. جۇما كۇنى ونىڭ مىڭنان استام جاقتاستارى الاڭعا شىقتى. ينگلاكتىڭ جاقتاستارى جينالعان ورىنعا پوليتسيا قىزمەتكەرلەرى قورشاپ تۇردى. دەگەنمەن كۇش قولدانۋ ارەكەتتەرى بولعان جوق.

جەكە ادۆوكاتىنىڭ ايتۋىنا قاراعاندا، سوت ۇكىمى شىعۋدان ءبىر ساعات بۇرىن ونى تاعى دا سوتقا شاقىرعان، الايدا ول دەنساۋلىعىنىڭ جارامايتىنىن  ايتىپ، سوت وتىرىسىنان باس تارتقان. سوت وتىرىسى  27 قىركۇيەككە وزگەرتىلدى. سوت شەشىمى ونى باس بوستاندىعىنان ايىرسا دا، ينگلاكتا 30 كۇن ۋاقىت بار. وسى ۋاقىتتا ول جوعارى سوت ۇستىنەن دە شاعىمدانا الادى.

“The Qazaq Times”