قازاقستان قىمىز ۇنتاعىن ەكسپورتتاۋ بويىنشا كەلىسسوزدەر جۇرگىزىپ جاتىر

قازاقستان مالايزيا، جاپونيا، وڭتۇستىك كورەيا، ەۋروپالىق وداق مەملەكەتتەرىنە قۇرعاق قىمىز ۇنتاعىن ەكسپورتتاۋ ماسەلەسى بويىنشا كەلىسسوزدەر جۇرگىزىپ جاتىر. بۇل تۋرالى قر اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى.

ۆەدومستۆونىڭ مالىمەتىنشە، قازىرگى تاڭدا قىتايلىق كومپانيالارمەن استىقتى، مايلى داقىلداردى، وسىمدىك مايىن ەكسپورتتاۋ ءۇشىن كەلىسىم-شارتقا قول قويىلسا، اراب امىرلىگى مەن يرانعا جاسىمىق تاسۋ ءۇشىن كومپانيالارمەن كەلىسىمگە قول قويۋ قايتا قارالىپ جاتىر.

ال، رەسەي، يزرايل، گونكونگ ەلدەرىنىڭ كومپانيالارىمەن كۇنباعىس تۇقىمىن، قاتتى بيداي، ۇن، نوقات، بۇرشاق، قوي ەتىن تاسىمالداۋ ءۇشىن كەلىسوزدەر جۇرگىزىلۋدە. قىتاي نارىعىنا سيىر، شوشقا ەتتەرىن، ءسۇت، قۇس ونىمدەرىن، ءتىرى جانۋارلار، سونىڭ ىشىندە جىلقىلاردى شىعارۋ جوسپارلانعان.

سونداي-اق، مينيسترلىك سىرتقى ىستەر مينيسترلىگىمەن بىرلەسە وتىرىپ، يزرايل، كۋۆەيت مەملكەتتەرىنىڭ ۆەتەرينارلىق قىزمەتىمەن قوي ەتىن جەتكىزۋ جولدارى بويىنشا كەلىسسوزدەر جۇرگىزىلۋدە. ال، پارسى شىعاناعى ەلدەرى بويىنشا كەلىسسوزدەر اياقتالۋعا جاقىن.

“The Qazaq Times”