فوتو: Forbes

«Qazaq Banki» اق 2017 جىلعى بانكتى كاپيتالداندىرۋ جونىندەگى جوسپارىنىڭ اياسىندا جالپى سوماسى 3,2 ملرد تەڭگە سوماسىنا 3 200 000 دانا قاراپايىم اكتسيالاردى ورنالاستىردى. ناتيجەسىندە بانكتىڭ جارعىلىق كاپيتالى 38,7 ملرد تەڭگەگە ارتتى. بۇل تۋرالى بانكتىڭ ءباسپاسوز قىزمەتى حابارلادى.

بانكتىڭ مالىمەتىنشە، دەربەس كاپيتالى سايكەسىنشە، 45,3 ملرد تەڭگەگە دەيىن ءوستى.

جارعىلىق كاپيتالدىڭ كەزەكتى تولتىرىلۋى جوسپارلى ۇدەرىس جانە اكتسيونەرلەردىڭ بانكتىڭ ودان ءارى تۇراقتى ءوسۋى ءۇشىن جانە قارجى تۇراقتىلىعىن قامتاماسىز ەتۋ ءۇشىن بارىنشا قولداۋعا دايىن ەكەنىن كورسەتەدى.

ال بۇدان بۇرىن 2017 جىلدىڭ شىلدەسىندە بانكتىڭ جارعىلىق كاپيتالى اكتسيونەرلەرمەن 2,2 ملرد تەڭگەگە تولتىرىلعان.

2017 جىلعى 1 تامىزداعى جاعداي بويىنشا بانكتىڭ اكتيۆتەرى 434 ملرد تەڭگەنى قۇرادى، ونىڭ ىشىندە، نەسيە پورتفەلى 334 ملرد تەڭگەگە جەتتى. مىندەتتەمەلەر - 392 ملرد تەڭگە. بانكتىڭ دەربەس كاپيتالى 42 ملرد تەڭگەنى، ونىڭ ىشىندە جارعىلىق كاپيتال 36 ملرد تەڭگە بولدى. قارجى ناتيجەسى 2017 جىلدىڭ 7 ايىندا 806 ملن تەڭگە كولەمىندە قۇرىلعان.

ايتا كەتەيىك، كەشە  «Qazaq Banki» اق-مەن بىرىگۋ جوسپارىن قۇرىپ جاتقان «Bank RBK» اق اكتسيونەرى ۆلاديمير كيمنىڭ قارجى ينستيتۋتىنىڭ جارعىلىق كاپيتالىن تولتىرۋ ءۇشىن 20 مرلد تەڭگە جۇمسايتىنى تۋرالى حابارلانعان بولاتىن. بانكتىڭ مالىمەتىنە قاراعاندا، كاپيتالداندىرۋ تۋرالى شەشىم ۇلتتىق بانك ازىرلەگەن بانك سەكتورىنىڭ قارجىلىق تۇراقتىلىعىن ارتتىرۋ باعدارلاماسىنا قاتىسۋ ماقساتىندا قابىلدانعان.

ال بانكتەردىڭ بۇلاي  جارعىلىق كاپيتالىن كوبەيتە باستاۋى ۇلتتىق بانكتىڭ ساۋىقتىرۋ باعدارلاماسى بويىنشا بولىنەتىن قارجىسىن قالاي بولسا دا يەمدەنىپ قالۋعا نيەتتى ەكەندەرىن بىلدىرەتىن سياقتى.

“The Qazaq Times”