گۇلنارا كارىموۆانىڭ رەسەيدەگى دۇنيە-مۇلكى بۇعاتتالۋى مۇمكىن

وزبەكستان باس پروكۋراتۋراسى رەسەي بيلىگىنەن گۇلنارا كارىموۆانىڭ ەل اۋماعىنداعى دۇنيە-مۇلكىن بۇعاتتاۋدى سۇرادى، داپ حابارلايدى رەسەي فەدەراتسياسى باس پروكۋراتۋراسىنىڭ ءباسپاسوز قىزمەتى.

رەسەي پروكۋراتۋراسى تاراتقان حابارلامادا، وزبەكستان پروكۋراتۋراسى تاراپىنان رف پروكرۋاتۋراسىنا گۇلنارا كارىموۆا ءىسى بويىنشا كومەك كورسەتۋ ماقساتىندا رەسەي اۋماعىنداعى كارىموۆانىڭ بارلىق جىلجىمايتىن مۇلىكتەرىن بۇعاتتاۋ كەرەكتىگى ايتىلعان رەسمي حات جولدانعان.

ەستەرىڭىزگە سالايىق، وزبەكستاننىڭ بۇرىنعى پرەزيدەنتى يسلام كارىموۆتىڭ قىزى گۇلنارا كارىموۆانىڭ ۇستىنەن 2013 جىلى قىلمىستىق ءىس قوزعالعان بولاتىن. ال 2015 جىلدىڭ تامىز ايىندا تاشكەنت قالاسىنىڭ سوتى كارىموۆانى 5 جىلعا باس بوستاندىعىنان ايىرعان ەدى. بىراق گۇلنارا كارىموۆا وسى ۋاقىتقا دەيىن تۇزەتۋ مەكەمەسىندە ەمەس ءۇي قاماقتا بولىپ كەلگەن.

وزبەكستان باس پروكۋراتۋراسىنىڭ مالىمەتى بويىنشا، گۇلنارا كارىموۆانىڭ مەملەكەتكە كەلتىرگەن شىعىنى 2 ميلليارد دوللاردى قۇراعان.

“The Qazaq Times”