«اتامەكەن» ۇكپ سالىق كودەكسى جوباسىندا قوسىمشا قۇن سالىعىنىڭ ادىستەمەسى بويىنشا وزگەرتۋلەردى تالقىلادى. قوسىمشا قۇن سالىعىنا (ققس) وزگەرتۋلەر ەنگىزۋ قازاقستان رەسپۋبليكاسى مۇشە بولعان ۇيىمداردىڭ تالاپتارىن ەسكەرە وتىرىپ جاسالدى. مىسالى جاڭا نورمالاردا دسۇ تالاپتارى ەسكەرىلگەن.

شاراعا ۇكپ باسقارما توراعاسىنىڭ ورىنباسارى رۋستام ءجۇرسىنوۆ، سالالىق مينيسترلىكتەر وكىلدەرى، مەملەكەتتىك كىرىستەر كوميتەتى وكىلدەرى، سونىمەن قاتار ونلاين بايلانىس ارقىلى وڭىرلەرلىك كاسىپكەرلەر قاتىستى.

«قوسىمشا قۇن سالىعى – بيزنەس سالاسىندا ماڭىزدى ورىن الاتىن، ساۋدا اينالىمىن رەتتەيتىن ماڭىزدى سالىق. سوندىقتان بۇل سالىمنىڭ اشىق جۇرگىزىلۋى، شاعىن جانە ورتا كاسىپكەرلىككە اۋىرتپالىق سالماۋى بارىنشا ەسكەرىلۋى ءتيىس»، – دەدى رۋستام ءجۇرسىنوۆ.

سالىق كودەكسىندەگى قوسىمشا قۇن سالىعى بويىنشا وزگەرتۋلەر جايىندا گۇلجان شاياندينا حابارلادى.

«ققس-تى ەسەپتەۋدىڭ ادىستەمەسىنە ايتارلىقتاي وزگەرىستەر ەنگىزىلگەن جوق. ءبىرىنشىسى ققس سالىعىنىڭ شەكتى ءمانى 30 مىڭ اەك كولەمىندە وزگەرىسسىز قالدى»، – دەدى گۇلجان شاياندينا.

اتالعان قۇجاتتىڭ بيزنەس تۇرعىسىنان العاندا باستى ارتىقشىلىعى ققس بويىنشا شەكتىك ءمانىنىڭ ساقتالاۋىندا – 30 مىڭ اەك.  سپيكەردىڭ ايتۋىنشا، جوسپار بويىنشا 2018 جىلى – 25 مىڭ اەك، 2019 جىلى – 20 مىڭ اەك، 2020 جىلى – 15 مىڭ اەك كولەمىندە ازايتۋ كوزدەلگەن.

قوسىمشا قۇن سالىعى بويىنشا  جەڭىلدىكتەر دە بار.

«2017 جىلعا دەيىن بوس قويمالار تەرريتورياسىنان تاۋارلاردى وتكىزۋ جانە وسىنداي تاۋارلاردى قارجى ليزينگىنە بەرۋ ققس-تان بوساتۋ بويىنشا نورمالار قولدانىستا بولدى. 2017 جىلى ۋاقىتشا نورمالار نەگىزىندە بوس قويمالار تەرريتورياسىندا جينالعان جانە بوس قويمالارعا 2017 جىلعا دەيىن اكەلىنگەن اۆتوبولشەكتەر مەن تولىمداۋشى زاتتار ققس-تان بوساتىلادى. ارنايى ينۆەستيتسيالىق شارت اياسىندا اۆتوماشينا جاساۋعا ققس بويىنشا جەڭىلدىكتەر ۇسىنىلىپ وتىر»، – دەدى گۇلجان شاياندينا.

ەگەر بەرىلەتىن مۇلىك ققس-سىز ساتىپ الىنسا، وندا مۇلىكتى قارجىلىق ليزينگكە وتكىزۋ ققس-دان بوساتىلادى.

سونىمەن قاتار، ققس بويىنشا ءتيىمسىز جەڭىلدىكتەر الىنىپ تاستالادى. ونىڭ ىشىندە دسۇ شارتتارىنا قايشى كەلەتىن نورمالار، لوتورەيا بيلەتتەرى، نوتاريۋس پەن ادۆوكاتتار قىزمەتى، پوشتالىق تولەم بەلگىلەرى (يمپورت، ىشكى نارىق), زاۋىتتار ءۇشىن التىن مەن پلاتينا ءوندىرىسى، ۇتىسسىز ويىن اۆتوماتتارى، دەربەس كومپيۋتەرلەر، بيليارد، ويىن جولاقتارى، كارتينگ، مەملەكەتتىك باج سالىعى بار وكىلەتتى ورگاندار قىزمەتىنە جۇرەتىن ققس جەڭىلدىگى الىنىپ تاستالادى. بۇل جەڭىلدىكتەر ءتيىمسىز دەپ تابىلدى. سونداي-اق، دسۇ تالاپتارىنا سايكەس اۋىل شارۋاشىلىعى تاۋار وندىرۋشىلەرىنە قولدانىلعان سانالعان ققس-نى 70%-عا ازايتۋ الىنىپ تاستالادى.

وزگەرتۋلەردى كاسىپكەرلەر قىزۋ تالقىلادى. سالىق كودەكسىندە اۋىل شارۋاشىلىعىنا قولدانىلاتىن ارنايى رەجيمدەر بار. باتىس قازاقستان وبلىسىنداعى «ۇلانوۆ» جەكە كاسىپكەرلىگى كودەكستە اوك وكىلدەرىنە كىمدەر جاتاتىن اشىپ جازۋدى ۇسىندى. «ماسەلەن، الما تەرۋشىلەر – ولار اۋىل شارۋاشىلىعى وندىرۋشىلەرى، ال سول الما عاشتىڭ جانە باسقا دا جەمىس اعاشتارىنىڭ كوشەتتەرىن وتىرعىزۋشى كاسىپورىن – اۋىل شارۋاشىلىعى ءوندىرۋشىسى ەمەس. ءبىزدىڭ كاسىپورىن كوشەت وسىرەدى، ءبىز قاي ساناتقا جاتامىز، نەگە بىزگە جەڭىلدىكتەر جاسالمايدى؟» – دەدى كاسىپكەر.

مەملەكەتتىك كىرىستەر جونىندەگى كوميتەت وكىلى كاسىپكەرگە اۋىل شارۋاشىلىعى مينيسترلىگى ەگەر كاسىپورىن جۇمىسىن اۋىل شارۋاشىلىققا جاتقىزسا عانا جەڭىلدىكتەر بولاتىنىن تىلگە تيەك ەتتى.

تالقىلاۋ بارىسىندا ارنايى ەكونوميكالىق ايماق ماسەلەسى كوتەرىلدى. ماسەلەن جاڭا زاڭ جوباسىندا بوس قويمالار بويىنشا عانا ققس جەڭىلدىكتەرى قاراستىرىلعان، ال ارنايى ەكونوميكالىق ايماققا قولدانىلمايدى.

وتىرىستىڭ ەكىنشى بولىمىندە ققس-تى قايتارۋدى اكىمشىلىكتەندىرۋ تالقىلاندى. جاڭا سالىق كودەكسىندە ققس-تى قايتارۋدىڭ مەرزىمدەرىن قر قارجى مينيسترلىگى باسقارما جەتەكشىسىنىڭ ورىنباسارى سالتانات ماتقۇلوۆا ايتىپ بەردى. ەڭ باستىسى ققس قايتارۋ مەرزىمدەرىن 30 جۇمىس كۇنگە دەيىن قىسقارتۋ ۇسىنىلدى. ققس-تى قايتارۋ قانداي تاۋار، جۇمىس، قىزمەت كورسەتۋ تۇرلەرى بويىنشا جاسالاتىنى ايتىلدى.

“The Qazaq Times”