فوتو: ontustik.gov.kz

وڭتۇستىك قازاقستان وبلىسىنىڭ ماقتارال اۋدانىندا ديقاندار ءونىم جيناۋ كەزەڭىن باستادى. ولار جالپى كولەمى 1005 گەكتار جەرگە ەگىلگەن جەمىس-جيدەك پەن جۇزىمنەن  بۇگىننىڭ وزىندە 2766 توننا ءونىم جينادى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.

ديقاندار وتاندىق نارىقتى قامتاماسىز ەتۋمەن قاتار جەمىس-جيدەكتەردى شەتەلدەرگە ەكسپورتتاۋدا.

جەمىس-جيدەك وندىرۋشىلەردىڭ ءبىرى - «ارسەنال ساد» وندىرىستىك كووپەراتيۆى. جەر اۋماعى 350 گەكتاردى قۇرايتىن باقتا جەمىستەردىڭ بارلىق ءتۇرى وسىرىلەدى. ماسەلەن، باقتىڭ 110 گەكتارىنا ءجۇزىم، 100 گەكتارىنا الما، 22 گەكتارىنا شابدالى، 25 گەكتارىنا قارا ورىك، 10 گەكتارىنا شيە ەگىلگەن.

60 توننا ءجۇزىمدى رەسەيگە جىبەرگەن كووپەراتيۆ قازىرگى ۋاقىتتا شابدالى جيناۋ ناۋقانىن باستاپ جىبەرگەن. شابدالى ءونىمىنىڭ باسىم بولىگى رەسەي فەدەراتسياسىنا جىبەرىلەتىن بولسا، قالعانى ىشكى نارىقتا ساۋدالاناتىن بولادى.

مۇندا  150 ادام تۇراقتى جۇمىسپەن قامتىلسا، ناۋقان كەزىندە 500-گە تارتا جۇمىسشىلار جۇمىسقا تارتىلادى. ونىمدەردى جيناپ، ساراپتاپ، سورتتاپ، ەكسپورتتىق جاشىكتەرگە جايعاستىرعانعا دەيىنگى جۇمىستى تۇگەلدەي تەرىمشىلەر اتقارادى. ءاربىر ءونىم ۇزاق جولدا جارامسىزدانباۋى ءۇشىن ولاردىڭ جاشىكتەردە دۇرىس ورنالاسۋى ماڭىزدى.

“The Qazaq Times”