فوتو: minfin.com.ua

جىل باسىنان بەرى بانكتەردىڭ شىعىنى 200 ملرد تەڭگەگە جەتكەن. بۇل پروۆيزيالاردى قالىپتاستىرۋ شىعىندارىنىڭ ارتۋىمەن بايلانىستى. بۇل تۋرالى قر ۇلتتىق بانكىنىڭ توراعاسى دانيار اقىشەۆ مالىمدەدى. 

ونىڭ سوزىنشە، جۇيەدەگى قارىز پورتفەلى بويىنشا پروۆيزيا 2,16 ترلن تەڭگە نەمەسە 1,6 پايىز دەڭگەيىندە قالىپتاسقان. قايتارىلمايتىن كرەديتتەردىڭ كولەمى 10,7%-دان 12,8%-عا، 1,72 ترلن تەڭگەگە جەتكەن. قازاقستاندىق بانكتەرىنىڭ جالپى اكتيۆتەرى جىل باسىنان بەرى 6,8%-عا تومەندەپ، 23,8 ترلن تەڭگەنى قۇرادى.

سونداي-اق، دانيار اقىشەۆ قازىرگى ۋاقىتتا بانك نارىعىندا وتىمدىلىكتىڭ ارتىقشىلىعى بار ەكەنىن جانە قازاقستاننىڭ 15 ءىرى بانكىنىڭ 9-ى نەسيە كولەمىن ۇلعايتقانىن اتاپ ءوتتى. شىلدە ايىندا بانكتەر ارقىلى ەكونوميكانى كرەديتتەۋ 0,7%-عا ءوسىپ، 12,79 ترلن تەڭگەگە دەيىن جەتكەن. ال سالالار بويىنشا ەڭ كوپ كرەديت ساۋداعا ( 18,7%), وندىرىسكە (14,2%), قۇرىلىسقا (7,6%), اۋىل شارۋاشىلىعىنا (5,9%) جانە ترانسپورت 4,6% سالاسىنا بەرىلگەن.

بۇدان بولەك ەكونوميكانىڭ دوللارسىزدانۋى جالعاسىپ جاتىر. دوللاريزاتسيا دەڭگەيى شىلدە ايىندا 1,1%-عا تومەندەپ، 48,6%-عا دەيىن ازايعان. باس بانكيردىڭ سوزىنشە، بۇل تەڭگەنىڭ دەۆالۆاتسياعا ۇشىراۋى مۇمكىن دەگەن قاۋەسەتكە بايلانىستى بولعان.

"تەڭگە السىرەيدى دەۋگە ەشبىر نەگىز جوق. تامىز ايىنىڭ باسىندا ۇلتتىق ۆاليۋتا سىرتقى جانە ىشكى نارىقتاعى فاكتورلاردىڭ اسەرىنەن قىسىمعا ۇشىرادى. ءتىپتى دوللاردى ساتۋشىلاردان گورى ساتىپ الۋشىلار كوبەيدى. حالىقتىڭ تەڭگەنىڭ ايىرباستاۋ باعامىنا نازار اۋدارۋىنا كەيبىر بۇقارالىق اقپارات قۇرالدارى مەن الەۋمەتتىك جەلىلەردەگى جاريالانىمدار سەبەپ بولدى", - دەدى اقىشەۆ.

بۇدان بولەك ول تەڭگە-دوللار بويىنشا وپەراتسيالاردىڭ جالپى كولەمى 2017 جىلعى شىلدەدە 11,9%-عا تومەندەپ، 11,9 ملرد دوللار بولعانىن ايتتى.  KASE-دە بولعان بيرجا ساۋداسىنىڭ كولەمى دە ءبىر ايدا 11,8%-عا نەمەسە 3,1 ملرد دوللارعا دەيىن تومەندەگەن. بيرجادان تىس بولاتىن وپەراتسيالار كولەمى 12%-عا، 8,8 ملرد دوللارعا دەيىن ازايعان. اقش دوللارىن ايىرباستاۋ پۋنكتەرىندە نەتتو ساتىپ الۋ 415,7 ملن دوللار بولعان.

"قازاقستان ەكونوميكاسىنا سانكتسيالار بەيتاراپ بولادى دەپ ەسەپتەيمىز جانە الەمدىك شيكىزات نارىعىنداعى تۇراقتىلىققا بايلانىستى  قازاقستان ەكونوميكاسىنا كەلەتىن قاۋىپ تومەن", - دەدى باس بانكير.

“The Qazaq Times”