قر ەنەرگەتيكا ءمينيسترى قانات بوزىمباەۆ. فوتو: energo.gov.kz

كەلەسى جىلدان باستاپ قازاقستان اقشىل مۇناي ونىمدەرىن ەكسپورتتاۋعا قاتىستى سالىنعان تىيىمدى كەرى شەگەرۋى مۇمكىن. بۇل تۋرالى قر ەنەرگەتيكا ءمينيسترى قانات بوزىمباەۆ ۇكىمەتتەگى ءباسپاسوز كونفەرەنتسياسىندا  مالىمدەدى.

ونىڭ سوزىنشە، قازىرگى كەزدە قازاقستان مەن رەسەي اراسىندا  اتالعان مۇناي ونىمدەرىن ەكسپورتتاۋعا بولمايتىن كەلىسىم بار.

"قازاقستان مەن رەسەي  اراسىندا اقشىل مۇناي ونىمدەرىنە قاتىستى كەلىسىم بار. قۇجات بويىنشا ءبىز ونى سىرتقا شىعارا الامايمىز. ويتكەنى ءبىز رەسەيدەن بەنزين مەن ديزەلدىك وتىندى باج سالىعىنسىز ساتىپ الىپ وتىرمىز. ءبىزدىڭ مۇناي وڭدەۋ زاۋىتتارىمىز ىسكە قوسىلعاننان كەيىن، بۇل كەلىسىمدى قايتا قارايمىز", - دەدى مينيستر.

سونداي-اق، ول اقشىل مۇناي ونىمدەرى  ورتا ازيا مەن اۋعانستان مەملەكەتتەرىنە ەكسپورتتالۋى ءتيىس ەكەنىن اتاپ ءوتتى. كاسىپورىنداردىڭ بيۋدجەتىنە تۇسكەن قاراجات ەسەبىنەن مودەرنيزاتسياعا جۇمسالعان قارىزدار وتەلەدى.

ايتا كەتەيىك، قازاقستاندا اقشىل مۇناي ونىمدەرىنىڭ تۇرلەرىن 2019 جىلدىڭ 1 قاڭتارىنا دەيىن ەكسپورتتاۋعا تىيىم سالىنعان.

ياعني ءبىز رەسەي نارىعىنا باعىنىشتى بولعاندىقتان ىشكى نارىقتاعى بەنزين جانە ديزەل وتىنىنا دەگەن سۇرانىستى قاناعاتتاندىرا المايمىز دەگەن ءسوز.

“The Qazaq Times”