ەندى تەرىدەن جاسالعان قىمبات سومكە ۇستاي المايتىن بولدىق

«جانۋارلار قۇقىعىن قورعاۋشى Peta, ەكزوتيكالىق جانۋارلاردىڭ تەرىسىنەن جاسالاتىن سومكە جانە وزگە دە تاۋارلاردىڭ ءوندىرىسىن توقتاتۋ ءۇشىن،  Louis Vuitton Moet Hennessey (LVMH) كومپانياسىنىڭ اكتسيالارىن ساتىپ الدى» دەپ حابارلايدى bbc.com.  

بۇل اكتسيا بولىگى Peta-عا اكتسيونەرلەر جينالىسىنا قاتىسۋعا جانە وزگە اكتسيونەرلەر الدىندا اشىق سۇراقتار قويۋعا مۇمكىندىك بەرەدى. الايدا ول ناقتى قانشا اكتسيا ساتىپ العانىن اتاپ كورسەتكەن جوق. بۇنداي ارەكەتتەر قۇقىق قورعايتىن توپتار اراسىندا كەڭ تاراعان. راسىمەن بۇگىنگى تاڭدا، نارىقتا «قولتىراۋىن تەرىسىنەن» جاسالعان تاۋارلار (سومكە، ءاميان، ت.ب.) جوعارى سۇرانىسقا يە ءارى باعاسى دا قىمبات. سوندىقتان دا، پاريجدەگى (Euronext) LVMH-ءتىڭ اكتسيالارىن ساتىپ الۋداعى باستى ماقسات: كومپانياداعى ەكزوتيكالىق جانۋارلاردىڭ تەرىسىنەن جاسالىناتىن تاۋار ءوندىرىسىن تۇبەگەيلى توقتاتۋعا مۇمكىندىك الۋ.

وسى جاعدايدان كەيىن LVMH ديرەكتورى سيلۆي بەرنارد پەتاعا جاۋاپ رەتىندە بىلاي دەيدى: «بىزدە سەرىكتەستەر اراسىندا ءسىز اتاپ كورسەتكەندەي ءادىس-تاسىلدەردى ەشكىم قولدانبايدى. جانۋارلاردى ءولتىرۋ نەمەسە زيان كەلتىرۋ – ءبىزدىڭ ىشكى زاڭىمىز بەن جەكە پرينتسيپتەرىمىزگە سايكەس كەلمەيدى».  LVMH –ەليتالىق برەندكە اينالعان الەمدەگى ەڭ ۇلكەن كومپانيا. اتالمىش برەندكە Louis Vuitton سومكەلەرى، شامپاننىڭ بىرنەشە ماركالارى، Hennessy كونياگى، Fendi جانە Marc Jacobs ءسان ۇيلەرى كىرەدى. سونداي-اق، كومپانيا ءيىسسۋ، وپا-دالاپ جانە اشەكەي بۇيىمدارىن نارىققا ۇسىنادى.

«The Qazaq Times»