الەمدەگى قازاق جاستارىنىڭ قاتىسۋىمەن وتەتىن ءداستۇرلى "الاش" فۋتبول كۋبوگى الماتىدا اياقتالدى . "جەزبۇيدا" جاستار قوعامدىق بىرلەستىگى وتكىزىپ جاتقان الا دوپ بايگەسىنە يران، قىتاي، مونعوليا، وزبەكستان قاتارلى ەلدەردەن كەلگەن اۋەسقوي فۋتبولشىلار مەن ەلىمىزدىڭ ءار ايماقتارىندا تۇراتىن، شەتەلدەن اتاجۇرتقا ورالعان قانداستارىمىز قاتىستى.

بۇل رەت جاسىل الاڭعا شىققان ون ەكى كوماندادان ەكى كۇنگە سوزىلعان قىزىقتى دا قيان- كەسكى جارىستىڭ ناتيجەسىندە فينالعا ىرىكتەۋگە "سايىن tech", "بىرلىك كەرۋەن", "دوس", "ساۋىر" كوماندالارى كىرگەن بولاتىن. ناتيجەسىندە "دوستى" 2: 1 ۇپايمەن جەڭگەن "ساۋىر" ءۇشىنشى ورىندى قانجىعاعا بايلادى. كوپ بولىپ كوز تىككەن شەشۋشى جارىس "بىرلىك كەرۋەن" مەن" "سايىن tech" اراسىندا ءوتتى. بۇل رەتكى دوپ دوداسىنىڭ "الاش" كۋبوگىن 5: 1 ۇپايمەن دارىندى ونەر كورسەتكەن "بىرلىك كەرۋەن" يەلەندى. "سايىن tech" وسى بايگەنىڭ ەكىنشى جۇلدەسىن ەنشىلەندى.

جارىس مايدانىندا توپ جارعان وسى كوماندالار اقشالاي سىيلىقتارمەن دە ماراپاتتالدى. ايتالىق، ءتورتىنشى ورىن العان "دوس" كومانداسى 50 مىڭ تەڭگەمەن، ءۇشىنشى ورىن العان "ساۋىر" 100 مىڭ تەڭگەمەن، ەكىنشى ورىن العان "سايىن tech" 200 مىڭ تەڭگەمەن، باس جۇلدە يەگەرى اتانعان "بىرلىك كەرۋەن" كومانداسى 500 مىڭ تەڭگەمەن سىيلاندى. ۇزدىك شابۋىلشى سىيلىعى "بىرلىك كەرۋەن" كومانداسىنداعى تۇراباەۆ سابيتكە بۇيىرسا، ۇزدىك ويىنشى "سايىن tech" كومانداسىنداعى اكىمحان جاساربەك بولىپ تابىلدى. ۇزدىك قاقپاشى بولىپ "دوس" كومانداسى كاپيتانى اراي سىيلاندى. وسكەمەننەن كەلگەن "التاي" كومانداسىنا ارنايى جۇلدە تابىس ەتىلدى.


وسىمەن ءۇشىنشى رەت ءوتىپ جاتقان ءداستۇرلى دوداعا "وردا پرينت" جارناما ورتالىعى، "بىرلىك كەرۋەن", "كوكجيەك" فوتو-ۆيدەو ستۋدياسى، "قاز لەد مەديا گرۋپ", "ۇلى دالا", "لەد وردا تەحنولوجي" قاتارلى كومپانيالار دەمەۋشى بولدى .
ۇشقان قۇستىڭ قاناتى تالاتىن ۇلانعايىر دالانىڭ ءار ساي-سالاسىنداعى قازاق جاستارىنىڭ باسىن قوسۋ، ەل تاۋەلسىزدىگىن ۇلىقتاۋ، الاش قايراتكەرلەرىن ەسكە الۋ ماقساتىندا وتكەن ءدۇبىرلى دودانىڭ ماڭىزى ەرەكشە.

ء"ۇشىنشى رەت ءوتىپ جاتقان بۇل شارا بيىل "الاش" كۋبوگى دەگەن اتىمەن ايىرىقشالانىپ تۇر. اسىرەسە، جاقىندا عانا وتكەن دۇنيە ءجۇزى قازاقتارىنىڭ بەسىنشى قۇرىلتايىندا ايتىلعان پرەزيدەنتتىڭ ۇندەۋىنە سپورتتىق شارالاردى ۇيىستىرۋ ارقىلى ۇلەس قوسىپ، ءارى وسى يگى شارالار وڭ جەمىسىن بەرىپ جاتقانىنا ءبىز قۋانامىز ارقاشاندا قولداۋشى بولامىز. اسىرەسە، الىستان كەلگەن جاستار وسى ارقىلى قازاق ەلىن تۇسىنەدى. ءبىر بىرىمەن تانىسىپ، ءبىلىسىپ، ءبىر شاڭىراقتىڭ استىندا ۇيىسۋىنا بەلگىلى دەڭگەيدە نەگىز بولادى", - دەپ اق جارما لەبىزىن ءبىلدىردى "جەبەۋ" رەسپۋبليكالىق قوعامدىق بىرلەستىگىنىڭ توراعاسى ومارالى ادىلبەكۇلى.

ادىلەت اxمەتۇلى

“The Qazaq Times”