ەندى دومبىرانى ۇيالى تەلەفوندا تارتىپ، ءان شىرقاۋعا بولادى

وڭتۇستىك قازاقستاندىق ونەرتاپقىش دومبىرانىڭ ەلەكتروندى نۇسقاسىن ويلاپ تاۋىپ، قولدانىسقا ەنگىزدى، دەپ حابارلايدى وقو ءباسپاسوز قىزمەتى. 

«Apple» كومپانياسى ماقۇلداعان بۇل باعدارلامانىڭ اۆتورى – وڭتۇستىك قازاقستاندىق  ءىT مامان  نۇرلان قامبار. ونەرتاپقىش جىگىت اتالعان باعدارلامانى جۋىردا عانا اقش-تاعى  «Apple» كومپانياسىنا ماقۇلداتىپ، اۆتورلىق قۇقىق يەسى اتانعان. وسىلايشا ەندى دومبىرانى ۇيالى تەلەفوندا تارتىپ، ءان شىرقاۋعا بولادى. ەگەر ۇيرەنۋ قاجەت بولسا، تەگىن  جۇكتەۋگە دە مۇمكىندىك بار.

ەلەكتروندى نۇسقا ازىرگە تەك Apple ءونىمىن قولدانۋشىلار ءۇشىن عانا قولجەتىمدى جانە اتالعان باعدارلامانى مىنا سىلتەمەدەن تەگىن جۇكتەپ الۋعا بولادى. 

ونەرتاپقىش نۇرلان باۋىرجانۇلى الماتىداعى سۇلەيمەن دەميرەل اتىنداعى ۋنيۆەرسيتەتتىڭ اقپاراتتىق جۇيەلەر ماماندىعىنىڭ  2-كۋرسىندا وقيدى.  جاستايىنان وقۋدا وزات بولىپ،  زەيىنى زەرەك وسكەن نۇرلاننىڭ الداعى ارمانى -  اتاقتى ءىT مامان اتانۋ.

دومبىرانىڭ ەلەكتروندى نۇسقاسىن ويلاپ تاپقان 20 جاسار جىگىتكە بۇل يدەيا  استاناداعى EXPO كورمەسىنە بارعاندا كەلىپتى. نۇرلاننىڭ بۇل  يدەياسىن ىسكە اسىرۋعا  «قازاقستاندىق ستيۆ دجوبس» اتانىپ كەتكەن ارمان سۇلەيمەنوۆ اقىل-كەڭەس بەرىپتى.

“The Qazaq Times”